Hyderabad. Telangana Assembly ki tahleel karte huwe Telangana Rashtirya Sameti ke sarbarah o Kaarguzar Chief Minister K. Chandrashekhar Rao ney riyasat mein intekhabi mahol ko garma diya hai. Telangana Rashtriya Sameti ney amlan intekhabi muhim ka aaghaz karte huwe aaj zila Sangareddy ke Husnabad mein apna phela intekhabi jalsa munaqqid kiya hai. Deegar siyasi partiyan bhi inteqhabat ke liye apni apni tayario mein lagi huwi hain. Mukhtalif siyasi partiyon ke qaayideen ke Telangana mein programmes ko qatiat di jarahi hai. Sadar Telugu Desham Party o Chief Minister Andhra Pradesh Mr. N Chandra Babu Naidu Telangana mein intekhabaat ka jaiza lainey 8th September ko Hyderabad pahonch rahay hain. Samjha jata hai ke woh Hyderabad mein party ke senior qaayideen se intekhabaat ki mansoobah bandi ke baaray mein tabadlah khayaal karen ge. Isi tarha saddar Bharatiya Janata Party Mr. Amit Shah bhi Telangana ka dora karne walay hain. Bataya jata hai ke woh 15th September ko Mahboob Nagar mein aik badey jalsa aam se khitaab karen ge. Telangana mein BJP ki nashiston mein izafah karne ke liye Mr. Amit Sha aik hafta se zayed Telangana mein qiyam karne ka bhi iradah rakhtay hain taakay woh raast apni nigrani mein intekhabi muhim chala saken. Sabiq Sadar Congress Party Mrs. Sonia Gandhi bhi 16th September ko Hyderabad ka daura kar sakti hain. Mrs. Sonia Gandhi ke alawa Congress ki intekhabi muhim ke liye Party Sadar Mr. Rahul Gandhi ke aik se zayed tours ka programme baneya ja raha hai. Maloom huwa hai ke Congress Party ke ahem qaideen Delhi pahonch chuke hain taakay intekhabaat ke silsila mein Party ka laiha amal tayyar karne markazi qaayideen se guft o shaneed ki jasakay. Telangana mein Congress Party ki intekhabi muhim ki nigrani ke liye Party ke Senior qaayed Mr. Gulam Nabi Azad bhi kuch dinon ke liye Hyderabad mein Camp karen ge.