Ahmdabad: Riyasat Gujrat mein apne bachoun ki shadi se kuch din qabal bhaag janay wala dulhe ka baap aur dulhan ki maa Police ke samnay pesh ho gaye hain. Gujrat mein nojawan premi jodey ka shadi ka mansoobah is waqt chopat hogaya tha jab un ke walidain achanak ghar se faraar hogaye kyunkay jawani mein wo loog ek dosray se mohabbat karte they.
Jawan jodey ki shadi Feb ke dosray haftay mein honi thi aur mangni ke baad guzashta ek saal se shadi ki tayyariyan jari then. Bachoun ki shadi se qabal ghar se faraar honay walay walidain police ke samnay pesh hue. Tafseelaat ke mutabiq Swati nami khatoon ne Police ko diye gaye apne bayan mein bataya ke wo Rakesh ke sath apni marzi se bhagee thi.
Taham un ke shohar jo apne walidain ke hamrah police station puhanche they unhoun ne Swati ko sath le janay se inkaar kar diya jis ke baad police ne Swati ko un ke walidain ke sath bhaij diya. Doosri taraf karobari shakhs Rakesh ka bayan bhi inhen janay ki ijazat dainay se pehlay qalamband kar liya gaya hai.
Sab Inspector Mahendra Singh ne kaha hai ke hum ne khatoon ke shohar ko qaail karne ki bohat koshish ki ke wo inhen ghar le jayen lekin unhoun ne inkaar kar diya kyunkay unhoun ne kaha hai ke un ki bohat badnami hui hai aur ab inhen is ( muamlay ) par sochnay ke liye kuch waqt chahiye.
Tafseelaat ke mutabiq 25 saal qabal dulhe ka baap jo ek ghareeb khandan se talluq rakhta tha is ka ek Ameer khandan ki ladki ke sath mohabbat ka talluq tha. Ladki ke ghar walay is rishte ke khilaaf they is liye unhoun ne Gujrat ke shehar Navsari mein ek nojawan se is ki shadi kardi.
Khandani zaraye ke bamujab Rakesh ( Ab dulhe ka baap ) ek saal qabal kisi rishte daar ki mout par is khatoon se mila. Is waqt dono ke bachay baday ho chuke they aur is shakhs ne khatoon ki beti ke liye apne betay ka rishta bhaij diya. Dono ladka aur ladki ek dosray se miley aur 8 mah pehlay hi un dono ki mangni hogayi jis ke baad shadi ki tayyariyan jari then.
Dono hi khandano ka ek dosray ke ghar aana jana rehta tha aur wo joda ek dosray se baqaidagi se mulaqaat karta. Wo dono Social Media par bhi ek dosray se raabtey mein they. Navsari Police ne kaha hai ke Swati ke shohar ko jab un ke is talluq ka pata chala to unhoun ne apni biwi ko khabardaar kiya. Taham dulhe ka baap 10 January ko dulhan ki maa ke sath faraar hogaya. Jis ke baad dono khandano ne ghumshudgi ki Report Police mein darj ki thi. –YTN STAFF