Hyderabad. Azaan International School Tolichowki mein na baaligh ladkiyon ke jinsi istehsal ke 2 waqeaat se nakhush High Court ne hafta ke din Commissioner School Education ko hidayat di ke imkanaat talaash kare ke School intizamia ko kis tarha mehkuma ki raast nigrani mein laya ja sakta hai. Adalat ul Aalia ne Commissioner School Education se kaha ke adalat ko peer tak iss baaray mein aagah kiya jaye. Azaan School ke aik taalib e ilm ke waalid Mir Yousuf Ali ki dair kardah aik darkhwast par Mr. Justice A Rajshekar Reddy ne yeh hidayat di. Darkhwast mein bayan kya gaya ke AP Educational Institutes Rules 1993 aur GO MS No. 1 of 1994 ki khilaaf warzi karte hue School chalanay par School ke Chairman aur Principal ke khilaaf koi karwai nahi ki gayi. Darkhwast guzar ki janib se paish hotay hue wakeel janab abdalmtin Qureshi ne bataya ke kisi qisam ke ahteyati iqdamaat kiye baghair taqreeban 2, 000 talba ke saath School chalaya ja raha hai. Unhon ne adalat ko aik na baaligh Taliba ke sath jinsi ziyadati ke waqea se Adalat ko waaqif kerwatay hue kaha ke phlay case mein FIR ke indraaj ke baad dosray din aisa hi aik aur waqea report huwa hai. Yeh do waqeaat zahir karte hain ke intizamia, idaara chalanay ka ahal nahi hai. Justice Rajshekar ne darkhwast mein bayan kardah nukaat par rad-e-amal zahir karte hue sharamnaak waqeat par naagawari ka izhaar kya aur kaha ke bachon ki salamati ke paish e nazar iss maamla ko aajilaana taur par nimtany ki zaroorat hai. Judge ne aayindah samaat peer ko muqarrar karte huve Commissioner se kaha ke School ko mehkuma ke raast nigrani mein laanay ke iqdamaat ki tajweez ke sath adalat se rujoo hoon.