Hyderabad. Attapur pillar number 143 ke qareeb masroof tareen sadak par 1 shakhs ka Traffic Constable ki maujoodgi mein din dhadhe qatal kardiya gaya hai. Qatal ke manazair ko muqami logon ney apne apne cellphones ke cameras mein mehfooz karliya. Tafseelaat ke mutabiq chaar afraad ney Ramesh naami shakhs ko rok liya aur un mein se 1 shakhs V Kishan Goud ney kulhaadi se paey dar paey waar karte hue iss ka qatal kardiya jabkey Laxman Goud ne qaatil ke qareeb kisi ko aane se rokta raha. Baad azaan in donon ne khud ko Police ke haawale kar diya.Qaatil iss qadar barham nazar arhha tha ke woh kulhaadi se paey dar paey waar karta raha aur iss ke qareeb aanay walon ko bhi kulhaadi se darane ki koshish ki. Woh qatal ke kuch dair baad wahan ruka raha. Aik mulzim ney maqtool ko pakad kar gira diya aur dosray ney iss par paey dar paey waar kiye jabkay deegar do mulzil laathian lehratey huve awaam ko qaatil ke qareeb jaany se rokay rakhtay rahay. Aik marhala par aik naujawan ney mauqa pakar qaatil ki kamar par laat maari jis se woh ladkhada kar zameen par gir pada magar fauri uth khada huwa aur doosron ko apne qareeb aanay se rokay rakhta raha. Yeh tasalii kar lenay par ke maqtool ke jism mein jaan baqi nahi rahi, mulzimeen sadak par ghumte rahay aur kuch dair baad bikes par wahan se rawana hogaye. Qatal ka saara manzar qareebi waqay CC Tv cameras ney mehfooz karliya. Kuch dinon se masroof tareen sadkon par din ki roshni mein qatal ki waardaat mein izafah honey laga hai jis se andaza hota hai ke shahar mein aam logon ki jaan kitni mehfooz hai. Bataya jata hai ke maqtool Ramesh qabal azeen Shamsabad Mochintal mein Mahesh Goud naami shakhs ke qatal ka asal mulzim tha. Maqtool isi qatal muqadma mein adalat mein haazri ke baad wapas lout raha tha. Bataya jaata hai ke Ramesh ne pyaar ke maamle mein Mahesh Goud ka qatal kar diya tha.