Hyderabad. Telangana Assembly ki tahleel ke khilaaf aik naujawan ney aaj Raj Bhavan ke rubaroo iqdaam khudsozi ki. Chief Minister Mr. K. Chandarshekar Rao ki Raj Bhavan aamad se kuch dair qabl aik naujawan ne Raj Bhavan ke rubaroo –apne aap par petrol chhidak kar aag laga lene ki koshish ki taham wahan maujood Media ke numayindon aur Security ohdedaron ney usay aisa karne se baaz rakha. Cabinet mein riyassti Assembly ki tahleel ki qarar daad manzoor karne ke baad Chief Minister Mr. K. Chandarshekar Rao, Cabinet ke faisla se Governor ko waaqif krwane aur Assembly ki tahleel ki sifarish paish karne ke liye Raj Bhavan pounchanay walay thay. Akhbaari numainday Raj Bhavan ke baab ud dakhila ke rubaroo Chief Minister ki aamad ke muntazir thay ke aik naujawan wahan pouncha jis ke haath mein aik plastic ka can tha jis mein petrol bhara huwa tha aur is ney Jai Telangana ke naaray lagatay hue aanan faanan khud par petrol chhidak liya aur jaib mein haath daal kar diya silai nikaalne wala hi tha ke is ke qareeb mauood media ke numaindon ney is ke haath pakad liye aur usay khud ko aag laga lene se baaz rakha. Wahan maujood security ohdedar bhi pahonch gay aur uss par qaboo pa liya. Media ke numaindon ke poochnay par is ney apna naam Eshwar bataya aur kaha ke woh Nizaam College ka taalib ilm hai. Uss ney bataya ke Chief Minister Mr. Chandarshekar ney bahut se wada karte hue nayi Telangana riyasat ki annan hukoomat sambhlaa magar apni meyaad ki takmeel se bahut pahelay hi Assembly tahleel karne ka faisla karliya taakay woh phir se Telangana mein Iqtidaar haasil kar sake. Iss naujawan ney kaha ke wadon ki takmeel ke baghair hi Assembly tahleel kardainay se woh mayoos hogaya hai.