Etawah : Samajwadi party ( SP ) ke sadar wo sabiq chief minister Uttar pardesh Akhilesh yadav ne riyasat mein saal 2022 ke assembly intikhabaat mein apni policy wazeh karte hue kaha ke intikhabaat mein unki party kisi bhi badi party se ittehaad nahi karegi balkay choti choti ilaqai partiyon se ilhaq karkay intikhabi ladeygi.
Apne afraad khandan ke sath Diwali mananay apne aabadi maqam Etawah pohanche aur yahan Akhilesh ne media numaindon se izhaar-e-khayaal kiya. Is mauqa par unhon ne BJP par bhi tanqeed karte hue kaha ke Bhartiya janata party ke Iqtidaar mein taraqqi ka koi bada kaam nahi hai jabkay na-insafi, zulm aur bad-unwani ka chahar sou door doura hai.
Awam ko diwali ki mubarak bad denay ke baad unhon ne kaha ke BJP Iqtidaar mein jhutay muqadmoun mein awam ko phansaya jaraha hai. Betiyan ghair mehfooz hain. police ka rawayya theek nahi hai. hukoomat ki policia kisaan mukhalif hain. riyasat mein kisanon ke sarson ke tail ki jagah beeroon mumalik se tail ko daraamad kiya jaraha hai.
Kisanon ke waqar ko majrooh kiya jaraha hai aur masail paeda kiye jarahay hain. Apne chacha shivpal yadav ki party se ittehaad se mutaliq puche gaye ek sawal ke jawab mein SP sadar ne kaha ke is party ko bhi kahin na kahin muntakhil kiya jayega. Jaswant nagar unki nishist hai. SP ne woh nishist unke liye chodi hai aur aanay walay waqt mein unkay log milein. Sarkar banayen hum unke leader ko kabeeni wazeer bhi banayenge.
Yahan qabil-e-zikar hai ke maazi mein pragati sheel samajwadi party ( lohya ) ke sarbarah wo sabiq SP leader shivpal yadav bhi samaajwadi party ( SP ) se ittehaad ki khwahish ka izhaar kar chukay hain. Saal 2017 ke intikhabaat se qabal hi Akhilesh aur shivpal ke darmiyan kasheedgi badh gayi thi. Shivpaal ne baad mein SP se alehadgi ikhtiyar karke pragati sheel samaajwaadi party ki tashkeel ka elaan kiya tha.