New Delhi: All India Majlis-e-Ittehadul Muslimeen ( AIMIM ) ke sar barah Asaduddin Owaisi ne BJP ke rehnuma Anurag Thakur ke ”Gadaru ko goli maru“ walay bayan par jawabi hamla kiya hai.
Asad Owaisi ne Mumbai ke Nagpada ke Jhoola Maidan mein munaqidah mein ek programme ke douran Anurag Thakur ko challenge kiya aur kaha ke mai aap ko challenge karta hon ke aap mujhe Hindustan mein wo jagah batayen jahan aap mujhe goli marenge, Mein wahan anay ke liye tayyar hon.
Asad Owaisi ne mazeed kaha ”Aap ke bayan se mujh mein koi khauf peda nahi hoga, Kyunkay hamari Maaen, Behnain badi tadaad mein sadak par hain aur unhoun ne mulk ko bachanay ka faisla kiya hai.
Wazeh ho ke, Rithala se BJP ke umeed waar Manish Choudhary ki himayat mein munaqidah ek jalsa aam mein Anurag Thakur ne intikhabi Rally mein CAA ki mukhalifat karne waloun ke talluq se, Logoun ko ishtial angaiz naara ”Mulk ke ghaddaroun ko goli maru“ lagane ke liye uksaya tha.
Jis ke baad ye maamla siyasi tor par garam ho chuka hai. Mangal ko Election Commission ne markazi wazeer Anurag Thakur ko Notice jari kiya hai. Aur un se jumaraat ki sah pehar tak apna jawab daakhil karne ko kaha hai.
Markazi hukoomat ki janib se mutanazia shehriat tarmeemi qanoon kuch reyastoun ko chod kar 10 January se nafiz hogaya hai, Jis ke tehat 3 mumulik Pakistan, Afghanistan aur Bangladesh ki ghir Muslim panah guzeroun ko hindustani shehriat di jaye gi. Aur is qanoon ke khilaaf mulk bhar mein ehtijaj kiya ja raha hai. –YTN STAFF