Lacknow: All India Majlis-e-Ittehadul Muslimeen ke sarbarah o rukan Parliament Hyderabad Asaduddin Owaisi ne markazi wazeer e dakhla Amit Shah ko shehriat tarmeemi Act ( CAA ) par behas ke liye challenge kiya hai. Amit Shah ne mangal ke roz Opposition rehnumao, Mamata Banerjee, Rahul Gandhi aur Akhlesh Yadav ko challenge kiya ke wo shehriat ke qanoon par behas karen.
Media report ke mutabiq, Asaduddin Owaisi ne kaha ke ”un se behas kyun.? Tum mujh se behas karo. Mein behas ke liye tayyar hon. Unhoun ne kaha ke ”un se behas kyun karna hai.? Behas kisi daadhi walay se karna chahiye. Mein un ke sath CAA, NRC, NPR par behas kar sakta hon. Musalmanoun par CAA aur NRC ke tehat imtiazi sulooq kiya ja raha hai, Jabkay CAA ke tehat Afghanistan, Pakistan aur Bangladesh ke ghair Muslim muhajreen ko shehriat dena chahtay hain.
Wazeh ho ke, Markazi wazeer e dakhla Amit Shah ne mangal ke roz shehriat tarmeemi qanoon ( CAA ) ki mukhalifat karne wali opposition jamaatoun ko behas karne ka challenge karte hue, Kaha tha ke jis ko bhi mukhalifat karni ho karen, Lekin CAA wapas nahi liya jaye ga.
CAA ki himayat mein Shah ne Lacknow ke bangla bazaar mein waqay Geta Park mein munaqidah ek jalsa aam se khitaab karte hue kaha mai ne ye bill Lok Sabha mein pesh kiya hai. Mein opposition se kehna chahta hon ke aap is bil par awaami satah par behas karen. Aur saabit karkay deikhein ke ye qanoon kisi bhi shakhs ki shehriat cheenta hai.
Amit Shah ne ye bhi ha ke ”Mulk mein CAA ke khilaaf Confusion phelaya ja raha hai, Fasadaat kiye ja rahay hain. Shah ne kaha ke mai aaj danky ki chout par ye keh raha hon ke, Jisay mukhalifat karna hai karen, CAA wapas nahi liya jaye ga. Shah ne kaha ”Congress aur SP sameit deegar opposition jamaten is ki mukhalifat kar rahi hain, Kyunkay un ki aankhoun par vote bank ki patti bandhi hui hai. -YTN STAFF