New Delhi : BJP ke senior leader aur sabiq wazeer-e-khazana Arun Jaitley neh sahet ki na saazi ki wajah se Wazeer-e-Azam Narendra Modi ki qayadat mein NDA ki nai hukoomat mein inhen wazeer na bananay ki darkhwast ki hai .
Jaitley neh wazeer-e-azam Modi ko ek maktoob likh kar yeh darkhwast ki hai. aap ki qayadat mein 5 baras hukoomat ka hissa rehna mere liye bohat aizaz ki baat rahi aur bohat kuch seekhnay ka mauqa mila. is se pehlay NDA ki pehli hukoomat mein bhi kaam karne ki khush qismati rahi. oppostion mein rehtay hue bhi party neh mujhe ahem faraiz sonpe. unhon neh mazeed likha ke taqreeban 18 mahino se woh sahet se mutaliq be had mushkil halaat se dochar rahay hain. doctoron neh ziyada tar mouqoun par inhen un halaat se ubharnay mein madad ki hai .
Maktoob mein sabiq wazeer-e-khazana neh Modi se kaha ke tashiri muhim ke khatam honay par unke Kedarnath rawana honay se pehlay unhon neh zabani tour par unse ( wazeer-e-azam se ) darkhwast ki thi ke woh muhim ke douran party ki zimma daari uthatay rahay hain lekin mustaqbil mein woh kisi bhi zimmadaari se door rehna chahainge taakay woh apna ilaaj karwa sakin aur sahet par tavajja day saken. Jaitley neh kaha ke woh is khat mein rasmi tour par darkhwast kar rahay hain ke inhen ilaaj aur sahet behtar karne ke liye waqt chahiye. is liye woh nai hukoomat mein koi zimma daari nahi lenge. unhon neh kaha ke unke paas apna kaafi waqt hoga aur hukoomat aur party ke liye woh ghair rasmi tour par kuch nah kuch karte rahenge. –YTN STAFF