Srinagar : Jammu & Kashmir ki sabiq wazeer-e-aala wo peoples Democratic party ( PDP ) ki sarbarah, Mehbooba Mufti neh itwaar ko kaha ke woh Article 35 A ke tahaffuz ke liye jail janay ke liye tayyar hain. jis mein jammu aur Kashmir ki khusoosi haesiyat ki baat kahi gayi hai.
PDP ke youm-e-Tasis ke mauqa par party kaarkunoun se khitaab karte hue Mufti neh markaz se kaha ”riyast mein Article 35 A se chedh chadh karna baarud mein aag laganay jaissa hoga. aur iss ke aisay tabah kin nataij Baraamad honge, jin par koyi qaboo nahi pa sakayga. agar koi haath Article 35 A ko choone ki koshish karega to nah sirf woh haath, balkay sara jism jal kar raakh banjayega.
Unhon neh kaha ke unki party riyasat ki khusoosi haesiyat ke tahaffuz ke liye chattaan ki tarhan khadi hogi aur iski hifazat karte hue jail janay ke liye bhi tayyar hain. unhon neh apne party kaarkunon se kaha ke woh Article 35 A ke tahaffuz ke liye ladai ladnay ke liye tayyar rahen.
Mehbooba Mufti neh sabiq wazeer-e-aala aur National Conference ke naib sadar Umar Abdulllah ko bhi tanqeed ka nishana banatay hue kaha ke Article 35 A se mutaliq supreme court ke faislay ko national conference ki janib se qubool kiya jayega. –YTN STAFF