Dubai: UAE nay Turkey se kaha hai ke wo Arab mumalik ke mamlaat mein mudakhilat se ba’az rahay. Tafseelaat ke mutabiq UAE ke wazeer baraye kharja umoor ney Turk wazeer difaa ke Libya ke hawalay se diye gaye bayan par tanqeed ki. Turk media nay wazeer difaa ka aisa bayan nashar kiya hai jis mein Libya ke muamlay par UAE ke tarz amal par tanqeed ki gayi thi. Wazeh rahay ke UAE, Misar aur Roos Libya ke mashriq mein commander khalifa Hafter ke haami hain jin ke jangju aalmi tor par tasleem kardah libya ki hukoomat ki afwaj se lad rahay hain.
Turk hukoomat nay guzashta kuch arsay se Tripoli mein qaim Libya ki hukoomat ki madad badhai hai. UAE ke wazeer baraye kharja umoor Anwar Gargash nay Twit kiya hai ke mojooda ehad mein noaabadyati zehan ki koi gunjaish nahi aur taluqaat dhamkion ke zariye astuwar nahi kiye ja satke.