Riyadh: Arab wazraye kharja ki satah par munaqqid honay walay Arab League Council ne Palestini Israeli tanaza ke hal ke liye Americi mansoobah mustard kar diya hai. Saudi Press Agency ke mutabiq Arab League ke Council ne kaha hai ke sadi ki Deal ke naam se maroof Americi mansoobah Palestini awam ke haqooq ke kam se kam miyaar se bhi aari hai.
Council ne kaha hai ke Americi mansoobah aalmi qanoon aur aqwam mutahidda ke Charter aur rooh se bhi mil nahi khata. Council ne apne ijlaas mein is baat par zor diya hai ke Americi mansoobah qabil iltifaat nahi, Is ke sath kisi qisam ka taawun nahi hoga. Council ne kaha hai ke Americi mansoobay mein Qaza Palestine ki taraf se tavajja hataane ki koshish ki gayi hai, Asal maslay ka siyasi hal pesh karne ke bajaye usay insani aur muashi bunyadoun par pesh kiya gaya hai. Council ne kaha hai ke Arab mumalik Israel ko khabardaar karte hain ke Americi pusht panahi aur himayat ka faida uthatay huve aisay iqdamaat se guraiz kere jinhein Arab bardasht nahi kar saktay . -YTN STAFF