Dubai: Khaleeji aur Arab mumalik mein Coronavirus hifazati iqdamaat ke bawajood phialta ja raha hai senkdoun afraad har roz is ka shikaar ban rahay hain. Tafseelaat ke mutabiq khaleeji mumalik mein Coronavirus ke 3930 musadeqa mamlaat Report huve jis ke baad mutasireen ki tadaad 78774 hogayi. Mutasireen mein se 17179 sahet yab ho chukay hain jabkay 325 ki haalat naazuk hai. Bohraan ke aaghaz se leker ab tak khaleeji mumalik mein marnay waloun ki tadaad 441 tak poanch gayi.
UAE mein Corona ke 546 naye mamlaat Record kiye gaye aur jumla tadaad 15378 hogayi. Emarat mein 3359 mareez sahet yab ho chukay hain jabkay amwaat ki tadaad 157 hai. Kuwait wizarat sahet ke mutabiq 187 Corona ke mareez sahet yab hogaye jis se shifa yab afraad ki tadaad 2219 hogayi hai. Qatar ki wizarat sahet ne kaha hai ke 830 naye mareez Record par aeye jis se majmoi tadaad 17972 hogayi hai.
Iraq mein guzashta 24 ghantoun ke douran 49 Corona ke naye mareez samnay aeye hain. Urdan mein Corona ke 2 naye mareez Report huve hain majmoi tadaad 473 hogayi. Marrakesh ki wizarat sahet ne kaha hai ke is ke yahan mazeed 163 afraad Virus ka shikaar hogaye hain jis se majmoi tadaad 5382 hogayi hai. Sky News ke mutabiq Misar mein 387 naye mamlaat darj huve aur mazeed 17 amwaat huven. Algeria ki wizarat sahet ke mutabiq 159 naye mamlaat Report huve jabkay 6 halakaten Record ki gayeen. –YTN STAFF