Bangloru: Musalmanoun ke khilaaf BJP leaderoun o karkonoun ki zeher afshani rukne ka naam nahi le rahi hai. Nea maamla Karnataka se samne aaya hai jahan ke BJP rukan Assembly Renukacharya ne dhamki bharay lehjey mein kaha hai ke wo apne ilaqay mein musalmanoun ko milne walay faiday rokk denge. Karnataka ke chief Minister B. S. Yediyurappa ke political secretary M.P Renukacharya ne kaha hai ke kuch aisay ghaddar hain jo Masjid mein baithtay hain aur Fatwa likhate hain. Wo namaz ada karne ki jagah masjid ke andar asleha akhatta karte hain. Kiya is liye tum Masjid chahtay ho? Unhoun ne mazeed kaha ke musalmanoun ne 2018 mein hamein vote nahi diya tha, Un ko milne wali khusoosi sahuliyaat band kar deeni chahiye.
Aisay waqt mein jab ke BJP sab ka sath, Sab ka vikas aur sab ka vishwas ki baat karti hai, Lagataar BJP leaderoun o arakeen musalmanoun ke khilaaf zeher afshani aur un ki sahuliyaat band karne walay bayanaat day rahay hain. Renukacharya ke bayan ke baad ek siyasi hungama shuru ho gaya hai. opposition ne un par firqa waranah siyasat karne ka ilzaam aed kiya aur kaha ke BJP ko aisay leaderoun ke khilaaf karwai karni chahiye.
Ek angrezi News channel se baat cheet karte hue Renukacharya ne apne bayan par safai pesh karte hue kaha ke mein pehlay bhi keh chuka hon ke mein unko buneadi sahuliyaat se daur nahi karoon ga. Mein un ko diye jane walay faiday aur khusoosi sahuliyaat rok dun ga. Renukacharya ne kaha hai ke wo ( Musalman ) kehte hain ke hum ghalat hain. Lekin woi loog congress ke liye vote karte hain aur unka istaqbaal karte hain. Unhein sambhal jana chahiye. Apni ghaltioun ko bhi dekhne ki zaroorat hai.
Qabil zikar hai ke Renukacharya 2008 se 2013 ki BJP hukoomat mein wazeer bhi reh chuke hain. Kuch dinoun qabal unhoun ne musalmanoun par riyasat bhar ki Masjidoun mein talwar, Chaako aur Soda ki Bottle sameit khatarnaak asleha jama karne ka ilzaam aayed kiya tha. Unhoun ne ye bhi kaha tha ke shehriat tarmeemi qanoon ki himayat mein bula gayi un ki rally mein Muslim shaamil nahi hue is liye wo apne Assembly halqa mein musalmanoun ki falah ke liye ane walay fund ko hindvoun ke liye kharch karen ge. –YTN STAFF