Amravati: Andhra Pradesh ke sabiq wazeer-e-aala Telugu Desam Party ke qaumi sadar N. Chandrababu Naidu ne riyasat ki mojooda afsoos naak sorat-e-haal ke liye YS Jagan Mohan Reddy ki zair-e-qayadat reyasti hukoomat ko zimma daar qarar diya. Unhoun ne kaha kay riyasat mein pida shudah corona ki sorat-e-haal se nimatnay ke liye hukoomat ne kuch bhi nahi kiya hai. Unhoun ne Guntur ke GGH hospital mein laashoun ki burii haalat ke liye hukoomat ko zimma daar qarar diya aur is ko afsoos naak sorat-e-haal se tabeer kiya. Unhoun ne mutalba kiya ke laashoun ki aakhri rasomaat protocol ke lehaaz se karni chahiye.
Unhoun ne sath hi awam mein is waba ke talluq se baydaari paida karnay ki zaroorat ko bhi ujagar kiya aur nishandahi ki ke kaafi ahthyat baratnay ki zaroorat hai. Unhoun ne sath hi Quarantine mein rakhay gaye afraad mein baydaari ki bhi zaroorat ko ujagar kiya. Unhoun ne Twitter par ek video bhi post ki jis mein unhoun ne kaha kay poori duniya corona ki wajah se pareshan hai aur muashi bohraan ka samna karra hi hai. Kayi afraad mulazimatoun se mahroom hogaye hain. Unhoun ne is waba ke teeka ke anay tak kaafi ahthyat ki zaroorat par zor diya aur kaha ke ghair zurori loog apne gharo se baher na nikle.