Amravati: Andhra Pradesh ke Governor Viswabhushan Harichandan ney 2 naye wuzra A Raju aur, C Vinugopal Krishna ku ohda aur raazdari ka halaf dilaya. Ye halaf bardari taqreeb Vijayawada ke Raj Bhavan ke darbar hall mein munaqqid ki gayi. Governor ney theek 1 bajkar 29 minute par un dono ko halaf dilaya. Is mauqa par wazeer e aala YS Jagan Mohan Reddy, Speaker T Sitamram, Wazeer Dharmana Krishna Das aur dosaroun ney shirkat ki. Covid-19 ke pesh e nazar halaf bardari ki taqreeb mein sirf mehdood afraad ney hi shirkat ki.
Un 2 naye wuzra ko P Subhash Chandrabose aur Mopi Devi Venkata Ramana ki jagah liya gaya hai jo Rajya Sabha ke liye muntakhib hue. Raju Srikakulam zila se talluq rakhtay hain jo pehli martaba 2019 mein Palsa halqa se Assembly ke liye muntakhib hue. Machhiroun ke Group se talluq rakhnay walay Mopi Devi ki jagah isi tabqa se talluq rakhnay walay Raju ko wazeer banaya gaya hai. Baleja tabqa se talluq rakhnay walay P Subhash Chandrabose ki jagah isi tabqa se talluq rakhnay walay mashriqi Godavari zila ke Vinogopal ko wizarat di gayi hai.