Cairo: Misar mein ek Primaray Classes ke taalib ilm ne English ke mazmoon mein nakaam hone par intiqam laine ke liye ustaad ko Rikshaw ( Auto ) se kuchal kar shadeed zakhmi kar diya. Police ne Teacher ko shadeed zakhmi haalat mein dawakhana pohanchaya jabkay mafroor taalib ilm ki talaash jari hai jo waqea ke baad ghar bhi nahi pouncha.
Miser ke janoobi ilaqay ki comshoneri Suhaj mein Primaray school ke Head Master ne ilaqay ke thaane mein Report darj karwai ke un ke ek ustaad haadsay ka shikaar ho gaye hain. Police ko milne wali ittila mein Head Master ki janib se mazeed kaha gaya tha ke haadsa ittifaqi nahi balkay jaan boojh kar kiya gaya hai. Police team ne jaye waqeya par pahonch kar is rikshaw ko apni tehweel mein le liya jis ke zariye ustaad ko kuchla gaya tha.
Zakhmi ustaad ke ibtidayi bayan mein kaha gaya hai ke shagird ne inhen Rikshaw se takkar maari thi. Ustaad ka mazeed kaha hai ke un ka shagird English mein kaafi kamzor tha, Wo har Test mein nakaam hota tha, Imthehaan se qabal is ke waalid ko bhi is ki taleem ke baarey mein ittila de di thi taakay wo apne betay par tavajja den. Ustaad ne waqeye ki tafseelaat batatay huve mazeed kaha ke talba mein imthehaan ka nateeja taqseem karne ke baad mein Ghar laot raha the ke achanak ek teez raftaar Rikshaw galli se nikal kar mujhe rondta huva guzar gaya. Ustaad ne kaha hai ke Rikshaw ki Driving seat par dekha to wahan wahi taalib ilm tha.
Police ne mafroor taalib ilm ke khilaaf iqdaam qatal ka muqadma darj kar ke is ki talaash shuru kar di. Doosri janib mafroor taalib ilm ke sathiyoun ne kaha tha ke nataij milne ke fori baad un ka saathi intahi ghusse ki haalat mein School se nikal gaya tha taham is ne kisi ko is baarey mein nahi bataya ke wo intahi had tak ja sakta hai. –YTN STAFF