Hyderabad: Hindustan ki Telugu riyasat Andhra Pradesh mein is waqt qayamat sughra ka manzar hai kyunkay Andhra Pradesh ke ilaqay waqay Vishakhapatnam mein ek Pharma Company se Gas kharij hone ka hadsa pesh aaya hai. Zehrili Gas kharij hone waqea ki wajah se 1 bacha sameit 7 logoun ki mout hogayi hai aur ek Report ke mutabiq 5000 se zayed afraad bemaar betaye jarahay hain. Media zaraye se masool ho rahi khabroun ke mutabiq Vishakhapatnam ke RR Venkatapuram gaon mai LG Polymers Company se Zehrili Gas kharij hogayi jo aas paas ke taqreeban 5 gaon mein phail gayi.
Is se qabal subah 3 logoun ki mout khabar aayi thi aur bataya gaya tha ke kam o besh 200 afraad bemaar hain lekin ye tadaad kaafi badh gayi hai. Narendra Modi aur markazi wazeer e dakhla Amit Shah ne is haadsa ke talluq se apna afsos bhi zahir kiya hai aur har mumkin madad ki yaqeen dehani bhi karai hai. Reyasti DGP ne waqea ke talluq se apne bayan mein kaha hai ke ab tak 7 loog halaak huve hain jin mein se 1 shakhs bhagne ki koshish mein kunwein mein gir gaya. Gas aaj subah taqreeban 3.30 bajey kharij huvi. Ilaqay mein bachao aur raahat kaari ka kaam jari hai. Lockdown ke sabab Planet band tha aur Gas rasao ke asbaab ka pata kiya ja raha hai.
Bataya jata hai ke logoun ke bemaar padney aur Gas rasao waqea ki khabar se shehar mein mahol kasheeda hogaya hai. Intizamia ne aas paas ke kuch gaon ko fori tor par khaali kara diya hai aur halaat ko sambhalne ki koshish ho rahi hai. Imkaan zahir kiya ja raha hai ke LG Polymers Company ke 3 kelo Meter ke dairay mein Gas rasao ka asar phail gaya hai. Waqea ki khabar melne ke baad mauqa par police, Fire Brigade aur Ambulance pohanchi aur bachao kaam shuru kiya.
Khabroun ke mutabiq Gas rasao ke baad logoun ko aankhoun mein jalan aur saans laine mein pareshani hone lagi jis ke baad kuch loog ilaaj ke liye Doctors ke paas bhi gaye. Jab ye masla bhadne laga to intizamia ne logoun ko mutasirah ilaaqoun se nikaal kar dawakhana mein daakhil karaya. Police afsar logoun se mehfooz jagah par jane ki Appeal kar rahay hain. Police pooray muamlay ki tafteesh kar rahi hai aur ye jan-ne ki koshish mein lagi hai ke aakhir Gas kharij hone ki wajohaat kya hain? –YTN STAFF