Amaravathi: Ek taraf jahan Hyderabad ke muzafaat mein ek khatoon vaterinary Dr ki ijtimai ismatdarri aur qatal ka maamla garmaya huwa hai, Aur mulk geer satah par awam mein gham-o-gussa ka mahol hai, Aur har taraf se is sharamnaak harkat par muzammat ki ja rahi hai. Aisay hi Andhra pradesh ke mashriqi Godawari zila se bhi ek aisa hi khofnaak waqea manzar aam par aaya hai.
Police ke mutabiq, Andhra Pradesh ke mashriqi Godawari zila ke G. Vemavaram gaon mein mobayyana tor par ek 50 sala bewa khatoon ko ijtimai ismatdari ke baad qatal kar diya gaya. Police ne bataya ke 3 logoun par ilzaam hai ke unhoun ne mazkoorah 50 sala khatoon ki ijtimai ismatdari ki, Jis waqt wo ghar mein akailee thi. Is ke baad unhoun ne is ka qatal kar diya.
Police ne ek mulzim ko giraftar kar liya hai aur deegar 2 ki talaash jari hai. Zilai Superintendent of Police Adnan Naeem Asim ne jaye waqooa ka dora kiya aur kaha ke 24 ghantoun ke andar un 2 afraad ko giraftar kar liya jaye ga.
Wazeh ho ke, Mutasirah khatoon ke shohar aur betay ka intqaal ho gaya tha aur is ki beti Hyderabad mein muqeem thi. Andhra Pradesh ke wazeer-e-dakhla M. Sucharita ne zella Guntur ke tamam khawateen police station ka achanak dora kiya. Kuch khawateen ne un se shikayat ki ke police un ki shikayat ka munasib jawab nahi day rahi hai.
Wazeer ne is baray mein tashweesh ka izhaar kiya aur kaha ke khawateen ke khilaaf juraim jari hain. Unhoun ne police se chokas rehne aur khawateen ke khilaaf juraim mein mulawis afraad ke sath sakhti se nimatnay ki hadaayat ki. –YTN STAFF