Washington: Americi Sadar Donald Trump apni Company ki ‘housekeeper’ ke muashaqa mein mubtala thae jis se un ka aik bacha bhi hai. Americi nashriyati idaara CNNA ney apni khusoosi report mein inkishaaf kya hai ke Sadar Trump ka apni Company ki housekeeper ke sath 2015 mein muashaqa raha hai jis ke nateeja mein aik bacha ki paidaiesh bhi hui. Iss ghair azdawaji talluq ke gawah Donald Tower ke aik darbaan Dino Sajudin hain. Trump Tower ke darbaan Sajudin ney Americi Sadar ke apni mulazima se muashaqa aur bacha ki paidaiesh se mutaliq maloomat Americi magazine AMI ko farokht ki theen jis mein muashaqa ki poori kahani bayan ki gayi thi. AMI ney aik moahida ke tehat yeh sotry 30 hazaar Americi dollar ke aiwaz kharidi. Moahida ke tehat Sajudin ko kahani kisi aur ko dainay ya kahin aur bayan karne par 1 million Americi dollar ki raqam ada karna ho gi. Magazine AMI ke sarbarah Trump ke dost hain iss liye unhon ney yeh kahani shaya nahi ki jab ke muahiday ke baayis Sajudin kahani ko kisi aur se bayan nahi kar saktay they. Yun yeh scandal dab gaya. Lekin ab Sajudin ke wakeel ney CNN ko bataya hai ke AMI se moahida khatam kar diya gaya jis ke baad un ke muakkil kisi ko bhi yeh sotry farokht karne ya kisi ke bhi samnay bayan karne ke liye azad hain. Wazeh rahay Americi Sadar Donald Trump ko pahelay hi magazine ‘Play Boy’ ki model Karen McDougal aur Stormy Daniels ke sath najaaiz taluqaat rakhnay aur sadaarti intikhab ke dauran dono models ko khamosh rehne ke liye raqum ki adaigi par tafteesh ka saamna hai. Iss muqadma mein Trump ke wakeel Michael kohn pehlay hi wada maaf gawah ban chuke hain.