Hyderabad. Aisay tulba aur afraad jo kisi wajah se apni taleem mukammal nahi kar paate hain un ke liye faslati taleem se Graduation ka mauqa hyderabad mein aik se zayed Universityon mein dastiyab hai jin mein Moulana Azad University aur Dr. BR Ambedkar Open University qabil zikar hain. Taleemi saal 2019 ke liye Ambedkar Open University ki janib se Graduation mein dakhiley ke liye ahliti imthehaan ki tafseelaat aur deegar umoor ki tawareekh bhi jari kar di gayi hain.
Ambedkar Open University ka ahliti imthehaan 28 April ko munaqqid ho ga. University ke aalamia ke bamujab aisay umeedwaar jinhon ne bazabta tor par taleem haasil ki ho ya bilkul unhon ne kisi Musalmah markaz se taleem haasil nahi ki ho woh ahliti imthehaan mein shirkat kar satke hain bashart kay yakam July 2019 tak un ki Umar 18 saal ho jaye.
Jo hazraat Ambedkar Open University ke faslati taleem ke zariye Graduation ke khawahish mand hain inhen 2019-20 taleemi saal mein dakhiley ke liye Online darkhwast daakhil karni hogi jis mein tamam zurori Asnad ke ilawa mojooda passport size ki tasweer bhi online up load karni hon gi. Online darkhwast dainey ke liye Telangana aur Andhra Pradesh mein TS, AP Online ke kisi bhi markaz se istifada kiya ja sakta hai.
Ahliti imthehaan 28 April ko ba rooz itwaar subah 10:00 bajey taa dopehar 12:00 bajey munaqqid hoga aur is ahliti imthehaan mein kamiyaab honay walay tulba ko UG Programme ke tehat taleemi saal 2019-20 ke liye degree saal awwal mein dakhila diya jaye ga. Graduation mein dakhiley ke liye darkhwast form daakhil karne ki aakhri tareekh 28 March muqarrar ki gayi hai. mazeed tafseelaat ke liye university ki Website www. braouonline.in mulahiza ki ja sakti hai.