New Dehli: Uttar Pradesh ke sabiq wazeer-e-Aala Akhilesh Yadav ne maharashra may hukoomat saazi se mutaliq bhartia janata party ko nishana banaya, aur kaha ke ”ab aisa lagta hai ke jis ka governor, is ki hukoomat. samaaj waadi party ke saddar Akhilesh Yadav ne ye tabsarah BJP rehnuma Fadnavis ke Maharashra ke wazeer-e-Aala ke ohday ka halaf lainay ke baad kiya. unhoun ne kaha ke hafte ki subah may soch raha tha ke kuch doosri partiyan riyasat may hukoomat bananay wali hain, lekin, ab may sochta hon ke jis ka Governor hai, uski hukoomat hai.
Wazeh ho ke Maharashra Assembly intikhabaat may BJP ko 105, Shive Sena ne 56, NCP ko 54 aur Congress ko 44 nashistain mili hain. BJP aur Shive Sena ne milkar aksariyat ke liye darkaar 145 number ko uboor kiya, lekin Shive Sena fifity fifity farmola chaah rahi thi. jis ke mutabiq hukomat chalanay ka Model dhai dhai saal tha, lekin BJP aur Shive Sena may ikhtilafat badh gaye aur dono jamaaton ki 30 sala purani dosti toot gayi.
Is ke baad Shive Sena ne Congress. NCP ke sath milkar hukoomat bananay ki jaddo jehed shuru ki. kayi dinon ki koshisho ke baad, aakhir-kaar Congress. NCP ne Shive Sena ki himayat karne par ittafaq kar liya aur jummay ki shaam tak kayi ijlason aur baat cheet ke baad Sharad Pawar ne elaan kiya ke Maharashra ke naye chief Minister Uddhav Thackeray hon ge aur tenun partiyan Governor se mulaqaat karen gi, aur hukoomat bananay ka daawa pesh karen ge.
Jummay ki raat 11:45 bajey BJP ne NCP rehnuma Ajit Pawar ke sath moahida ka faisla kiya aur raat ke waqt Governor Secreteriat se sadar Raj ko khatam karne ke liye Notification jari karne ko kaha gaya. aur hafta ki subah Governor ne Davindra Fadnavis ko wazeer-e-Aala aur NCP ke Ajit Pawar ko naib wazeer-e-Aala ka halaf dilaya. Governor ke isi kirdaar se mutaliq Akhilesh Yadav ne tanqeedi nishana banatay hove kaha ke ”ab to lagta hai, jis ka Governor, uski hukoomat. –YTN STAFF