Kolkata: Ahmedabad aglay saal ke shuru mein England ke doray ke douran day night gulaabii gaind test ki maizbani kere ga, Yeh baat BCCI ke sadar Sourav Ganguly ne yahan kahi. England January se March tak 5 test aur mehdood Overs ki series ke liye Hindustan ka dora kere ga. Ganguly ne CPI ( M ) ke MLA Ashok Bhattacharya ki ek kitaab ki rounamai ke douran Kolkata Press Club mein kaha Ahmedabad England day-night test karwaye ga.
Maazi qareeb mein Hindustan mein Covid-19 muamlay mein izafay ki wajah se yeh qiyaas aaraiyan ki jarahi theen ke is series ko Mutahidda Arab Emarat mein muntaqil kiya ja sakta hai, Jahan filhaal IPL 2020 chal raha hai, Lekin BCCI England ki Hindustan mein hi maizbani ka azm rakhta hai aur pehlay hi Bio Safety ko bananay samait tamam mumkina mutabadil ki talaash mein hai.
Ahmedabad, Dharamshala aur Kolkata test series ke 3 maqamat honay ka imkaan hai lekin Ganguly ne kaha ke abhi un ka koi hatmi faisla nahi huwa hai. Ganguly ne kaha hum ne kuch aarzi mansoobay banaye hain lekin abhi tak kuch nahi tay kiya gaya hai. Hamaray paas abhi 4 mah ka waqt baqi hai.
BCCI ke sadar ne kaha ke un ki tarjeeh Australia ka aindah mujawaza dora hai jis ke liye team ka intikhab kuch din mein hoga. England se pehlay hamaray paas Australia ki series mojood hai. Kuch hi dinon mein team ka intikhab hoga. Ganguly ne kaha ke IPL ke foran baad hi test format mein tabdeel hona khiladion ke liye koi masla nahi hoga. Woh tamam mayaari khiladi hain.
Jahan tak gharelo season ki baat hai BCCI ne yakam January se Ranji Trophy shuru karne ka faisla kiya hai aur Ganguly ne kaha ke anay wali salana General Meeting ( AGM ) mein is ki tafseelaat par amal kiya jaye ga. AGM jald hi hoga aur hum wahan Ranji Trophy ke baray mein faisla karen ge.