New Delhi : Riyasat Jharkhand mein anqareeb assembly intikhabaat munaqqid honay walay hain. ye intikhabaat 30 November se 20 decemeber tak 5 marahil mein munaqqid honge. Jharkhand assembly intikhabaat ke liye jahan tamam partiyon nay kamar kas li hai, wahein Asaduddin Owaisi ki party, AIMIM bhi hissa le rahi hai.
Iske liye Owaisi nay khud intikhabi muhim chalanay ka bedah uthaya hai aur iske douran woh mukhalfin par shadeed hamla kar rahay hain. AIMIM party nay peer ko tweet kiya ke ”koyla Jharkhand ka, zameen Jharkhand ki aur bijli Bangladesh ko? aap ko Bangladesh se itna pyar hai, aap nay apne Jharkhand ke qabayliyon aur kisanoun ki zameen cheen li.
AIMIM ke zareya tweet karda ek video mein, party ke sir-barah Asad Owaisi nay wazeer-e-aazam Narendra Modi par hamla karte hue kaha ke ”Jharkand ka koyla, Adani ka paisa, Modi ka chaheeta aur bijli Bangladesh ko, Jharkhand ko nahi. aap ko mohabbat Bangladesh se hai aur hum se kehte hain ke to Bangladeshi hai. unhon nay sawal kiya ke ”aap ko Bangladesh se itna pyar kyun hai?
Wazeh hoke, AIMIM nay Jharkhand intikhabaat ke liye apni party ke umeedwaron ki doosri fehrist jari ki hai. party sarbarah Asaduddin owaisi nay elaan kiya tha ke un ki party AIMIM Jharkhand mein 20 nishistoun par election ladeygi.
Jharkhand mein assembly intikhabaat 5 marahil mein munaqqid honge, pehla marhala 30 November ko, dosra marhala 7 decemeber ko, teesra marhala 12 decemeber ko, chowtha marhala 16 decemeber ko aur panchawan marhala ki 20 decemeber ko votng hogi. aur intikhabaat ke nataij ka elaan 23 decemeber ko kiya jayega. –YTN STAFF