Hyderabad: Aam ke shoqeen afraad ke liye khush khabri hai ke unka man-pasand mewa is saal kaafi sasta honay ka imkaan hai.
Telugu reyaston andhra aur telangana mein is saal aam ka mausam mazeed meetha honay wala hai kyunkay badhti hui pedawar ke nateejay mein aakhir-kaar awam ke liye phalon ki qeemat kam hosakti hai. kaasht karon ne kaha hai ke pichlle season ke bar aks is saal bhaari barish aur mausam ki munasib sorat-e-haal rahi jis ke nateejay mein telugu reyaston mein aam ki ziyada paidawar horahi hai.
Warangal ke ek kisaan srinivas jo zilai kisaan association ke sadar bhi hain unhon ne kaha hai is saal hum behtar paedawar haasil karne ja rahay hain kyunkay aam ke phool har jagaah phoolnay lagey hain. is ki ek bunyadi wajah yeh hai ke hamari riyasat mein is saal kaafi barish hui hai. Pichle season ke baraks kaafi barish hui aur mausam ki sorat-e-haal achi hai is se aam ke season mein behtar paedawar mein aasani hogi. Is ke nateejay mein qeematon mein kami bhi askati hai taham hum iska taayun ab nahi kar saktay hain.
Is saal manson mein telangana mein ziyada barish hui aur kisi bhi azlaa mein barish ke khasaray ka saamna nahi hua. Riyasat-e-telangana state development planning society ( TSPDS) ke mutabiq jahan riyasat mein ek saal mein aam barish 853.1 millimeter record hoti hai guzashta saal riyasat mein 1259 millimeter barish hui.
Aam sir fehrist aath phalon mein se ek hai jo riyasat telangana mein haasil hota hai. riyasat ke mehakma baghbani ke mutabiq ausatan riyasat mein aam ki kaasht ke tehat 2.89 laakh acre araazi hai aur is mausam mein taqreeban 10.23 laakh metric ton aam paeda hota hai. Muqami istemaal ke liye kaafi aam paeda karne ke ilawa, riyasat Rajasthan, utar pardesh aur shumali Hindustan ki deegar reyaston mein bhi aam bar aamad karta hai. aam ki ziyada tar paedawar nizaamabad, adilabad, Nalgonda, mehboobnagar, Kurnool, warangal, rangareddy, Sangareddy aur deegar azlaa se hoti hai. kisanon ko tawaqqa hai ke aam ka season March ke aakhir mein ya April ke shuru mein hoga.