New Delhi : Aam aadmi party ki naraaz rukan-e-assembly Alka Lamba ne mangal ko congress party ki uboori sadar Sonia gandhi se unki rehaish gah par mulaqaat ki, aur is qiyaas aarai ko hawa di ke woh aglay saal ke shuruvaat mein qaumi dar-ul-hakoomat mein munaqqid honay walay assembly intikhabaat se qabal congress party mein shaamil ho sakti hain.
Alka Lamba jo Dehli ki chandni chowk assembly halqa ki numaindagi karti hain, taqreeban 12: 30 bajey Sonia gandhi ki rehaish gah pohanchi. dono rehnumao ke darmiyan mulaqaat ek ghanta tak jari rahi.
Lamba ne august ke shuru mein kaha ke unhon ne aam aadmi party ki ibtidayi rukniat se istifa dainay ka faisla kiya hai aur woh azad umeed waar ki haesiyat se aindah assembly intekhabt ladhingi. party ne bhi kaha tha ke woh unka istifa Manzoor karne tayyar hai. haal hi mein ekhtataam ko pohanche lok sabha intikhabaat mein party ki mayoos kan karkardagi par Lamba ne aam aadmi party par shadeed tanqeed ki hai.
Unhon ne party sarbarah aur Delhi ke wazeer-e-aala Arvind Kejriwal se jawab talab kiya tha. jiske baad inhen party ke arkaan ke official whatsapp group se hatadya gaya tha. unhon ne party ke liye lok sabha intikhabaat mein intikhabi muhim mein bhi hissa nahi liya. wazeh ho ke dar-ul-hukoomat Dehli mein 70 assembly halqoun ke liye aglay saal ke awail mein intikhabaat munaqqid honay walay hain. –YTN STAFF