Hyderabad : City Traffic additional DCP Anil kumar ne kaha ke ” 12 September ko shehar mein ganesh ki murtiyon ke visarjan programme ke pur aman ineqad ke liye tamam iqdamaat kar rahay hain.
Unhon ne bataya ke unhon ne traffic ki pareshani se bachney ke liye intizamaa ke tehat 2,100 police ahelkaar tainaat kiye hain. Balapur ganesh shobha yatra ke barey mein unhon ne kaha ke iska ineqad 18 kilometer ke faaslay par kiya jayega aur is shobha yatra ke rastay par jaaney wali line se kisi gaadi ko jaaney nahi denge. aur shehar ke tamam ahem maqamat par police hukkaam ki nigrani hogi.
DCP ne kaha ke jo log apni gadiyon mein safar karte hain woh apni gadiyon ko makhsoos parking ki jaghon par khadi karen. unhon ne shehar se bahar safar karne walon ko takeed ki ke woh kisi bhi qisam ki traffic pareshani se bachney ke liye shehar ke andar se guzarnay ke bajaye, outer ring road ka istemaal karen.
Unhon ne tank bund par ganesh visarjan program ka mushahida karne ka iradah rakhnay walay afraad se bhi darkhwast ki ke woh wahan tak pounchanay ke liye metro train ka istemaal karen. unhon ne ganesh pindal managers ko apne visarjan ke programme ko jald se jald mukammal karne aur police ke sath taawun karne ki takeed ki. –YTN STAFF