New Delhi: Sabiq wazeer e aazm Manmohan Singh ney itwaar ko Narendra Modi hukoomat ko Mulk mein muashi sust rawi ke liye un ki policion ko zimme daar tehraya. Mumtaz maahir muashiaat o sabiq wazeer e aazm Manmohan Singh ney kaha ke Hindustan mein taiz raftaar sharah se taraqqi ki salahiyat hai. Lekin Modi hukoomat ki hama jahat bad intizami is sust rawi ka nateeja hai.
Manmohan Singh ney apne bayan mein muashi sust rawi ko insanoo ke liye bohraan qarar dete huwe bunyadi tor par Modi hukoomat ke note bandi se mutaliq faislay aur mojooda maeeshat ki sorat e haal ke liye ujlat mein laago kiye gaye ”GST ke faislay ko zeeme daar qarar diya.
Congress ney apne official Twitter handle par Singh ka bayan share kiya hai. Congress rehnuma ney kaha ke sirf Auto Mobile Sector mein 3.5 lakh se ziyada mulzeemate zaya ho gayeen aur unhon ney ghair rasmi shobay mein bhi isi terha ke barray pemanay par mulazmat se mehroom honay ka daawa kya.
Dehi mushkilaat par roshni daaltay huwe Singh ney kaha ke Kisanoo ko munasib qeematein nahi mil rahi hain aur dehi aamdani mein kami waqay huwi hai. Modi hukoomat jisay kam afraat zar ki sharah ko zahir karna pasand karti hai, woh hamaray kisanon aur un ki aamdani ki qeemat par aati hai. jis se hindostan ki 50 feesad abadi ko takleef pahunchti hai.