Hyderabad : TRS ke car-guzaar sadar KT Rama Rao nay aaj kaha hai ke Telangana riyasat ki kisi bhi doosri siyasi jamaat ke muqablay mein Hukmuran jamaat ko logoun ki himayat haasil hai. unhon nay TRS head quarter mein kaha ke party ko riyasat mein kal 60 laakh members miley hain.
Jumeraat ko TRS ki membership muhim ke ikhtetaam par KTR nay yeh baat kahi. unhon nay kaha ke unki party ko logoun ki bharpoor himayat mil rahi hai. KTR nay is muhim mein hissa leker usay kamyaab bananay walay sabhi logon ka shukriya ada kiya.
Unhon ne kaha ke BJP , jo riyasat mein ahem opposition honay ka daawa karti hai, is ke sirf 12 laakh member hain. TRS ke car-guzaar sadar ne bataya ke Gajwel aur Vardhannapet membership muhim mein agay rahay aur muqami leadron aur party ohdedaron se unke is muhim ko kamyaab karne mein ahem kirdaar ke liye unse izhaar tashakkur kiya.
Unhon nay mazeed kaha ke is membership nay yeh saabit kar diya ke wazeer-e-aala K .Chandra shekhar Rao falahi mansooboun par mustaqil nifaz ke khwaahan logon ki himayat haasil karte hain. unhon nay kaha ke azlaa mein TRS daftaron ka iftitah Dussehra se kiya jayega. –YTN STAFF