Beirut: Mashriq wasti mulk Lebanon ke ek Maroof angrezi akhbar ne mulk ke ab-tar halaat par munfarid ehtijaj record karwatay hue pooray ka poora akhbar khaali shaya kardiya. yeh pehla mauqa hai ke Lebanon mein kisi akhbar ne mulk ke muashi, iqtisadi, samaji, corruption, siyasi Adam istehkaam, be-rozgari aur maholiyati aloodgi sameit deegar masail par munfarid ehtijaj record karwaya. Lebanon ke Maroof angrezi akhbar’ The Daily star’ ne 8 augst ko apne 12 safhaat par koi bhi khabar shaya kiye baghair apna munfarid ehtijaj record karwaya. akhbar ke 12 safhaat ko khabron aur columns ko khaali chodh kar mulk ke tamam badey masail par ek ek jumla likha gaya.
Akhbar ne apne munfarid ehtijaj ke zariye mulk mein firqa wariyat jaisay masail aur hukoomat ki janib se kisi bhi muamlay ko hal karne ke liye khaas iqdamaat nah uthaye jane ki janib tavajja mabzol karwai gayi. mulk ke Maroof akhbar ke tamam safhaat ko khabroun aur columns se khaali dekh kar jahan qaryin haeran reh gaye, wahein kayi afraad ne akhbar ke koshish ki tareef bhi ki.
The Daily Star ke khaali aur ek ibaarat par mushtamil safhay dekh kar qaryin haeran reh gaye lekin unhon ne is koshish ki sataish bhi ki. akhbar ne apne online edition mein bhi 8 august ko pooray akhbar ko khaali shaya karne ke hawalay se ek mukhtasir khabar shaya ki aur bataya ke’ Daily Star’ ne hukmraanoun ko mulki mamlaat hal karne ke liye uthnay ki aawaz di hai. 12 safhaat par mushtamil akhbar ke pehlay safhay ko siyah karkay badey alfaaz mein Lebanon likha gaya jab ke aakhri safhay par maholiyati tabdeeli ki tasweer dete hue hukmraanoun ko aawaz di gayi ke isse qabal ke bohat der hojaye, mulki mamlaat hal karne ke liye utheen. –YTN STAFF