Hyderabad : Telangana pradesh congress committee ( TPCC ) ke sadar aur rukan-e-parliment Uttam kumar reddy ney jumerat ko markazi wazeer-e-dakhla Amit Shah ki janib se, riyasat Telangana ke qiyam ke liye ikhtiyar kiye gaye amal par tanqeed karne ko ghair zurori qarar diya.
Gandhi bhavan mein press conference se khitaab karte hue, Uttam kumar reddy ney Amit Shah ke un tabsaroun ki muzammat ki, jis mein unhon ne kaha tha ke parliment ke darwazay band kar ke riyasat Telangana ki tashkeel ki gayi thi“. Uttam kumar ney kaha ” ek aam amal hai ke jab bhi voting ke zareya bill Manzoor kiye jatay hain, to lok sabha aur Rajya sabha ka darwazay band kar diye jatay hain.
Unhon ney mazeed kaha ke Telangana ki tashkeel is waqt ki gayi thi jab congress ki zair-e-qayadat UPA hukoomat ney ek muqarara amal ki pairwi ki thi aur iske sath sabhi siyasi jamaaton se wasee tar mushawarat ki gayi thi. unhon ney kaha ke Telangana ki siyasi jamaatoun ney Telangana ke qiyam ki himayat ki thi.
Taham, wazeer-e-aazam Narendra Modi aur Amit Shah ney mutadid mauqa par baar baar AP ki taqseem ke liye ikhtiyar kardah amal par tanqeed ki. kiya iska matlab yeh hai ke unhon ney Telangana riyasat ki tashkeel ko mustarad kardiya?
Yeh intahai afsoosnaak hai ke jab Amit Shah ney parliment mein un mutanazia tabsaray kiye to TRS ke arkaan khamosh rahay. Uttam kumar ney is maamla par Telangana BJP qaideen ki khamoshi par bhi sawal uthaya.
Uttam kumar reddy ney yeh bhi elaan kiya ke baldiyat mein congress party ke parcham kushai ke programme mein 19 august tak towsee kardi gayi hai. unhon ney party cadre se appeal ki hai ke woh Telangana bhar mein badey paemanay par tamam baldiyat mein ”anti anti congress, programme munaqqid karen.
Unhon ney daawa kiya ke yeh programme ab tak bohat badi kamyabi haasil kar chuka hai aur party rehnumaoun par zor diya ke woh baen baazu ke ilaaqoun mein hi programme ka ineqad karen. Unse Uttam kumar reddy ney 20 august ko sabiq wazeer-e-aazam Rajiv gandhi ke 75th yom-e-paidaiesh ki taqrebaat badey paemanay par munaqqid karne ki bhi hidaayat di.
Is se qabal Uttam kumar reddy ney municipal intikhabaat ki tayariyoun ka jaiza lainay ke liye senior rehnumao ke sath meeting ki. municipal intikhabaat mein pasmandah tabqaat ke liye reservation feesad ko kam karne par wazeer-e-aala KCR ki pur zor mazammat karte hue unhoun ney party cadre ko TRS hukoomat ke BC mukhalif chehray ko logoun ke samnay be-naqaab karne ki hidaayat ki.
Unhon ney is baat ka id-daa kiya ke congress party BC aur musalmanoun ko baldeati intikhabaat mein 50 % feesad ticket degi. unhon ney mutalba kiya ke BC ko unki abadi ke tanasub ke mutabiq reservation diya jaye, aur daawa kiya ke congress kaafi mazboot hai aur aaindah baldeati intikhabaat mein aksariyat ke sath nishistoun par kamyabi haasil karne ki salahiyat rakhti hai.
Jaiza ijlaas ( NSS) mein CLP rehnuma Mallu Bhatti, AICC secretaries Bose Raju, Saleem Ahmed and Vamshichand Reddy, TPCC Working Presidents Ponnam Prabhakar aur Kusum Kumar, DCC Presidents deegar ahem qaideen ney shirkat ki. –YTN STAFF