Agra : Uttar Pradesh police nay Agra mein 1 shakhs ki bachay ko aghwa karne ke shuba mein pitaayi karne ke baad 200 logoun ke khilaaf maamla darj kiya hai. Madhya pradesh police ki janib se ”Khargun zila ke 9 logoun ko isi tarhan ke waqeye ke silsila mein girftar karne ke 48 ghantay ke baad yeh waqea samnay aaya.
Agra mein yeh maamla mangal ke roz pesh aaya tha, lekin chaharshambe ke roz yeh is waqt manzar-e-aam par aaya, jab is hamla ki Video footage police ki tavajja mein layi gayi. circle officer sadar, Agra, Vikas Jaiswal nay sahafion ko bataya ke 200 afraad ke khilaf muqadma darj kiya gaya hai. unhoun nay mazeed kaha ke city police mazkoorah waqea ki video footage ki madad se mulzim ki shanakht karne mein lagi hai.
Unhon nay mazeed kaha ke unki shanakht ho jaaney ke baad unki giraftari amal mein aayegi. jaiswal nay kaha ke muqami police is silsila mein muqami logoun mein shaoor bedar karne ki koshish kar rahi hai. bachon ko aghwa karne ke waqeaat se mutaliq kisi bhi sargarmi ki soorat mein logoun ko police ko aagah karne ke liye kaha ja raha hai.
Bachoun ke aghwa karne ke shubah par hujooomi tashadud ka yeh waqea zila Agra se manzar-e-aam par anay wala aisa dosra waqea hai. police nay is se qabal 9 noujawanon ko, zehni tor par mazoor 60 sala khatoon ko bachay aghwa karne ke shuba mein zado kob karne ke ilzaam mein girftar kiya gaya tha. –YTN STAFF