Hyderabad: Hyderabad city police ney 2,981 zabt shuda gaadiyoun ke malikaan ko notice jari kar di hain taakay woh apni gaadi ko haasil karlen is se pehlay ke police mehakma un gaadiyoun ki neelami karde. mutaliqa shobay ke Hukkam ke mutabiq zabt shuda gaadiyoun ke malikaan ko notice jari karte hue inhen Hidayat di gayi hai ke woh July ke ikhtetaam se qabl apni gaadiyoun ko haasil karlen kyunkay is ke baad mehakma un gaadiyoun ki neelami karega jo ke hyderabad police act 2004 ke dafaa 7 ke tehat gaadiyoun ki neelami ki jayegi.
Gosha mahal ke inspector Narsimha Murti ney kaha hai ke zabt shuda gaadiyoun ke mutaliq koi bhi shakhs agar malikana huqooq ya koi aur haq rakhta hai to woh apni gaadi haasil karne ke liye commissionaire of police Basheerbaagh mein apni darkhwast de sakta hai aur darkhwast dene ke baad pandrah dinoun ke andar gaadi hawalay kar di jaye gi aur agar koi shakhs is karwai ko mukammal karne mein nakaam rehta hai to phir is ki gaadi ko bhi neelami ke liye pesh kar diya jayega. is ke alawa woh gaadi ke husool ke liye www.hyderabadpolice.co.in par bhi apni darkhwast day sakta hai.
Is se qabal guzashta saal 25 July 2018 ko Hyderabad police ney gosha mahal mein zabt shuda 379 gadiyoun ki neelami ki thi. iske alawa fazil saz-wo-samaan ki bhi neelami amal mein layi thi. guzashta 3 barsoun ke douran hyderabad police ney 10483 zabt shuda gaadiyoun ki neelami ki hai jis mein 9473 gadiyaan scrap mein daali gayi hain. doosri janib awam ke liye bhi yeh ek mauqa hai ke woh mehakma police ki janib se nelaam ki jaaney wali behtar gadiyoun wajibi qeematon mein haasil kar saken, kyunkay hyderabad mein mustamela gaadiyoun ki khareed wo farokht ki tijarat bhi bhi kaafi ahmiyat ki haamil hai. –YTN STAFF