New Delhi : Congress sadar Rahul Gandhi ney Wazeer-e-Azam Narendra Modi par shadeed tanqeed karte hue kaha kay unhon ney 5 saal mein mulk ki maeeshat ko tabah wo barbad kiya, bad unwani ko panah di aur kisanon, nojawanon aur khawateen ko nazar andaz kiya hai. mulk ke awam ney inhen Iqtidaar se bahar ka rasta dikhaane ka zehen bana liya hai .
Rahul Gandhi ney congress headquarters mein munaqqid press conference mein kaha ke BJP intikhabaat haar rahi hai aur Modi ke chehray par nisf intikhabaat khatam honay ke baad ab yeh wazeh dikhayi day raha hai. Modi hukoomat ney mulk ke awam ko aziat di hai, samaaj ko baantane ka kaam kiya hai aur aalmi satah par mulk ki saakh mutasir kar di hai, lehaza mulk ke awam inhen sabaq sikahnay jarahay hain. unki hukoomat chand dinon ki maheman reh gayi hai.
Congress sadar ney kaha ke Modi aur RSS ke kaam karne ka tareeqa, niyati Aayog, Election Commission, Reserve bank aur Supreme Court jaisay aaeni idaron par dabao bana kar kaam karne ka hai. Election Commission bhi unke kaam karne ke isi tareeqay se mutasir nazar araha hai aur is wajah se apni zimmadarion ki adaigi mein woh kaafi kamzor nazar aa raha hai. jab Modi ko ehsas hota hai ke woh election haar rahay hain to is ki wazeh jhalak unke chehray par nazar anay lagti hai aur phir woh pooray nizaam ko barbaad karne se hichakte nahi hain .
Unhoun ney kaha ke yeh baat unhoun ney guzashta intikhabaat mein Modi ko mili shikast ke tajrubay ki bunyaad par keh rahay hain. samnay shikast dekh kar woh kuch nah kuch naya karne ki koshish karkay voters ko mutasir karne ki koshish karte hain. Gujrat mein haar rahay they to wahan’ C-PLAN’ jaissa naya kaam karkay logon ko mutasir karne ki koshish ki. Rahul gandhi ney Wazeer e Azam par fouj ki siyasat karne ka ilzaam lagaya aur kaha ke Modi fouj ko apni zaati milkiyat samajte hain. fouj kisi ki zaati milkiyat nahi hai. Wazeer e Azam teeno foujoun ko apni milkiyat samajte hain aur fouj ki tauheen karte hain. fouj ney apna kaam kiya hai aur woh kisi shakhs ki nahi balkay mulk ki hai, Wazeer e Azam ko iski siyasat nahi karni chahiye aur fouj ka ehtram karna chahiye .
Unhon ney ilzaam lagaya ke Wazeer e Azam ney mulk ke nojawanon ka rozgaar cheena hai, Note Bandi aur GST nafiz karkay mulk ke karobariyon ko barbaad kiya hai. unki kamzor iqtisadi policy ki wajah se Mutwast tabqa ki kamar todhdi hai . –YTN STAFF