Nashay Ki Haalat Mein Driving Ke Khilaaf Mahana Hazaro Muqadmaat Tashweesh Naak
Hyderabad: Raat ki tareqi jab aati hai to awam ke liye masail badhtay hain jabkay shehri zindagi bhi raat ki tareqi ke sath kayi ek masail lekar aati hai yahi wajah hai ke hyderabad aur is ke muzafati ilaaqon mein khaas kar raat ke auqaat me noshi ke sath driving ki wajah se sadakh hadsaat mein din badan izafah ho raha hai, halaanke nashay ki haalat mein driving karne walon ke khilaaf traffic police aur qanoon nafiz karne walay idaron ki janib se sakht tareen iqdamaat kiye ja rahay hain lekin iske baad har chand din mein ek aisa waqea zaroor runuma hota hai jis mein nashay ki haalat mein driving sadakh hadsaat aur musafireen ki mout ki khabrein padhnay mein aati hain .
Rawan haftay Hyderabad ke muzafati ilaqay Yadgiri gutte ke qareeb paish aaya jahan college ki salana tak reeb mein shirkat karne ke baad hyderabad apne makanaat wapas lotney walay nojawanon ki ek toli taiz raftaar gaari ke sadakh haadsay ke baad mout ke neend so chuki hai. 5 talba jo ke college ki salana tak reeb mein shirkat karne ke baad shehar wapas lout rahay they lekin nashay ki haalat mein driving ki wajah se unki car ko jo ke 120 kilometer fi ghanta ki raftaar se daudh rahi thi haadsa ka shikaar hogayi aur is haadsa mein 5 talba mein 4 ki pehlay hi mout hogayi, jis mein 22 saal ki Praneeta jis ka talluq Chadarghat se tha, Kuttapet ka 22 saal ka Sapoorti reddy , Ameerpet ka 23 sala Chaitanya aur 30 saal ka Vinit reddy ki mout waqay hogayi. yeh nojawan dost college ki tak reeb mein shirkat karne ke baad jab Hyderabad wapas lout rahay they to Nageenpelli mein raat 11 baj kar 20 minute Par Unki car taiz raftari ki wajah se be qaboo hogayi kyunkay car ki raftaar 120 kilometer se bhi ziyada thi jabkay yeh college ki tak reeb mein mouj masti kar kar shehar hyderabad wapas lout rahay they. unhon ne achi khasi miqdaar mein me noshi ki thi .
Hyderabad aur iske muzafati ilaaqon mein nashay ki haalat mein driving karne ke har mah hazaron muqadmaat darj kiye jarahay hain jis mein kayi afraad ko jail ki salakhon ke peechay bhi jana pad raha hai. is ke alawa kayi afraad ke driving licence ko mansookh karne ke alawa unpar bhaari jurmana bhi aed kiya ja raha hai. agar sirf guzashta mah April ke adad o shumaar dekhen jayen to nataij kaafi tashweesh-naak hain kyunkay sirf mah April mein 2282 nashay ki haalat mein driving karne walon ke khilaaf muqadmaat darj hue hain, jinhein teesray aur chouthay metro Politian magistrate court Nampally mein paish kiya gaya jis par adalat ne 498 afraad ko jail ki saza sunai. jin afraad ko jail ki saza hui un mein ek mulzim ko ek mahinay ki qaid, 26 afraad ko das din ki qaid, 45 afraad ko saat din ki qaid, 8 afraad ko chay din ki qaid, 21 afraad ko paanch din ki qaid, 21 afraad ko chaar din ki qaid, 42 afraad ko teen din ki 125 afraad ko do din ki qaid, tenun afraad ko ek din ki qaid jabkay 116 afraad ko adalat ki karwai mukammal honay tak kahin jaany ki ijazat nahi di gayi .
jahan tak driving licence ko mansookh karne ki saza ke adad o shumaar hain is mein 4 afraad ke driving licence ko hamesha ke liye mansoob kardiya gaya hai jabkay 163 aisay afraad hain jin ke driving licence ko saat din taa teen saal ke liye mansookh kardiya gaya hai. 17 afraad ke driving licence ko teen saal ke liye, 29 afraad ke licence ko do saal ke liye, 16 afraad ke licence ko daidh saal ke liye, 40 afraad ke licence ko ek saal ke liye, 59 afraad ke licence ko 6 mah ke liye jabkay chaar mah aur saat din ke liye fi kis ek fard ke licence ko mansookh kardiya gaya hai .
Police aur adalat ki janib se sakht tareen iqdamaat aur sazaon ke bawajood shehar hyderabad mein nashay ki haalat mein driving ke badhtay waqeat tashweesh naak hain jis ne aam shehrion ko pareshan kardiya hai kyunkay behtar haalat mein apni manzil maqsood ki simt rawan dawaan rehne ke bawajood hamesha yeh khadsha laga rehta hai ke doosri koi gaadi jis ka chalanay wala nashay mein to nahi hai jisse haadsa ho sakta hai. nashay ki haalat mein driving aur hadsaat ke waqeat khaas kar hafta aur itwaar ki raat ziyada ho rahay hain kyunkay yeh woh ayyaam hain jis mein aksar nojawan nasal taqarib mananay aur companies ki partiyon mein me noshi mein masroof rehti hai aur der raat gay gharon ki wapsi ke douran yeh kisi haadsay ka shikaar hokar apni aur dosaron ki jaan ke liye msbit ban rahay hain .-YTN STAFF