Hyderabad: TPCC ki tashhiri committee ki sadar nasheen wo sabiq rukan-e-parliment Vijay shanti ney Board of Intermediate ki janib se jari kardah nataij mein bad unwaniyoun par mushkil sorat e haal se dochar talba ke masail ke silsila mein ghair hassas honay par cheif minister KCR par shadeed tanqeed ki. congress ki qayadat ki janib se is masla par riyasat geer ehtijaj ki appeal par Vijay shanti ney Warangal mein dharna diya. unhon ney is mauqa par kaha ke intermediate ke nataij ke masla par izhaar-e-khayaal ke liye chief minister ko 6 din lagey. un be qaadgyon ke nateeja mein 20 se zayed talba ney khudkushi karli .
Police ney Vijayshanti aur zila ke deegar cogressi leadron ko girftar karliya jinhon ney Ekasila Park se ehtajaji Rally nikaali. police ki janib se unko hirasat mein liye janay ke baad Vijaya shanti ney collector ko yad-dasht hawalay karne ki unko ijazat nah diye janay par hukoomat par shadeed tanqeed karte hue kaha ke is se TRS hukoomat ki aamranah hukmarani zahir hoti hai. Vijaya shanti ney ilzaam lagaya ke reyasti hukoomat nojawan talba ki zindagion se khilwadh kar rahi hai .
Sabiq wazeer Srikha Konda aur district congress committee ke sadar N.Rajendra Reddy bhi girftar shudgan mein shaamil thay. police ko congress ke kaarkunon ki badi tadaad ko qaboo karne mein dushwariyon ka saamna karna padh raha tha jo Ekasila park par jama hue thay. un ahtejajyon ney TRS hukoomat ke khilaaf naaray baazi ki. Wazeer-e-taleem Jagdish reddy se istifa ka mutalbah kiya. isi douran hyderabad mein beshtar congressi leadron Bashmole AICC secretary wo sabiq rukan-e-parliment Hanumanth Rao jo hyderabad collectorate ke rubaroo ehtijaj kar rahay thay ko bhi hirasat mein le liya gaya .
Congress ke leadron ney saddar TPCC Uttam kumar reddy ki appeal par tamam zila Head quarters mein sarkari dafatir ke samnay ehtijaj kiya . reyasti collectorate ki taraf janay ki koshish karne walay 50 se zayed talba aur unke leadron ko giraftar karliya gaya. Beshtar BJIM ke kaarkunon ney shehar mein Minister quarters ke qareeb ehtijaj karne ki koshish ki jin ko giraftar karliya gaya. chilchilati dhoop ki parwah kiye baghair hazaron talba aur unke walidain ney daftar Board of Intermediate ke rubaroo ehtijaj kiya aur unse insaaf karne ka mutalbah kiya . – YTN STAFF