Riyadh: Saudi Arab main in dinon kaafi inqalabi tabdeelian aayi hain jin mein khaas kar khawateen ko un kamon ki bhi ijazat di gayi hai jin kamon par guzashta kayi dahoo se pabandi Ayad thi aur un mein bhi khaas kar khawateen ko Draving ki ijazat qabil zikar hai. khawateen ko Draving ki ijazat milney ke baad ab Saudi se Formula Race ke liye bhi khawateen agay aa rahi hain aur un mein sare fehrist naam Reema Juffali ka hai.
Saudi Arab ki khatoon Driver Reema Juffali Formula 4 British Championships mein pheli martaba hissa le rahi hain. Reema Juffali ke sath is Championship mein aalmi shohrat Yafta Driver Lois Forster aur Sebastian Alvarez bhi shaamil hain. Jeedah h mein peda huwi 27 sala Reema ney apni Racing Career ka aaghaz October 2018 mein Saudi Arab mein khawateen par Driving par pabandi hataane ke kuch mah baad kiya.
Reema ney is zimn mein kaha ke yeh mere liye aizaz hai ke mein Bartanwi Formula 4 Race mein Mulk ki numaindagi kar rahi hon. Reema ney apne ahal khanah, doston aur chahaney walon ki janib se hosla afzai par shukriya ada kiya aur kaha ke mein ney kabhi socha bhi nahi tha ke zindagi mein aisa kuch kar sakun gi. Reema ney Bartanwi Formula 4 ki Website se izhaar khayaal karte huwe kaha ke chand saal phelay aisi Race mein shareek hona namumkin tha jo ke itnay mukhtasir waqt mein ho gaya jis par mein bohat shukar guzar aur khush hoon. Reema ney kaha ke behtar se behtar karne aur agay bhedne ke liye mere khandan aur doston ki hosla afzai mere liye bohat ahem hai. Is saal Race ki Championship ke liye zabardast muqablay hon ge jis ke liye mein tayyar hoon.
Reema Juffali is se phelay America mein taleem haasil kar rahi thi. Saudi Arab wapas aney ke baad is ney Bartanwi Formula 4 Race mein hissa lainey ka elaan kya jis mein duniya ke Naamwar Driver hissa le rahay hain. Reema Juffali GCC Mumalik ki teen khawateen mein se aik hain jin ke paas car race mein hissa lainay ke liye Licence mojood hai. Unhon ney Abu Dhabi ke Marina Circuit mein TRD 86 Cup ke muqablay mein pheli Testdrive main hissa liya aur yeh licence haasil kya.
Race Team ke incharge Anthony Height ney kaha ke Bartanwi Formula 4 Race mein Reema ki kisi bhi level mein pheli mukammal race ke liye pur-umeed hain. Yahan Car Race ka andaaz aur Car Race ke munfarid raastoon ke sath mazeed seekhney ke liye bohat kuch hai. Reema is shoba mein bohat kuch kar sakti hai kyunkay is ney chand mah mein bohat badi kamyabi haasil kar li hai. Bartanwi Formula 4 championship Race Single Driver aur body se bahar niklay huwe phaiyon wali gaadi ki munfarid daud hai jo Bartania ke mukhtalif race track par April taa october ke darmiyan munaqqid karwai jati hai.- YTN STAFF