Hyderabad. Tappa Chabotra Police Station hudood mein waqay Sharda Nagar, Gudimalkapur ilaqa mein aik qaata e araazi se jis ke bichon beech aik qabar waqay hai, kal shaam namaloom afraad ne Ganesh ki tooti phooty Moorti rakh di thi, Police ko is ki khabar milnay par fauri harkat mein atay hue Moorti ko wahan se hata diya gaya aur Police Station muntaqil kardiya gaya hai. Police ne isteqdami karwai karte hue khamoshi ke sath is Moorti ko htadya hai. Police ohdedaron ne bataya ke mumkin hai ke tooti phooty iss Moorti ko kisi ne yahan khuli zameen dekh kar chod gaya hoga taham hum is baat ka pata laganay ki koshish kar rahay hain ke aaya yeh na danista amal tha ya kisi ki shararat. Iss ilaqa ke CC TV footages ke zareya iss ka pata laganay ki koshish ki jarahi hai. Sharda Nagar colony mein taqreeban 200-250 murabba gaz ki aik khuli araazi hai jis ke beechon beech aik khuli qabar hai. Yeh qabar kis ki hai is ke baaray mein qareebi ilaqa ke Musalman bhi kuch bataney se qassir hain. Logon ne bataya ke aik arsa se yahan aik qadeem qabar hai jis par ab kuch logon ne chadar chadha rakhi hai taakay is qabar ki nishani baqi rahay. Iss qabar ke atraaf koi aur qabar na honey ki wajah se yeh ehtemaal nahi rehta hai ke yeh qabrastan hai taham yeh kisi walii ya buzurg ki qabar hosakti hai. Chunkay is ilaqa ki abadi ziyada tar ghair Muslims par mushtamil hai is liye sahib e qabar ke baaray mein kuch ziyada maloomat nahi hosaki. Waqf Board mein bhi is ka koi record shaed maujood nahi hai chunkay kuch baras qabal is qabar ke atraaf kachra phenka ja raha tha jis ki safai muqami naujawanon ne ki thi aur uss waqt Waqf Board ke arbab se rabita qaayim karte hue iss qabar aur iss ke tehat araazi ki Sayanat karne ka mutalba kiya gaya tha.