Hyderabad. Kul Hind Majlis Ittehad ul Muslimeen (AIMIM) aur Owaisi Group of Hospitals ki janib se selaab se mutasirah Kerala ke awam ke liye 25 lakh rupay maliati mukhtalif nauiyat ki adwiyaat aaj Darussalam se gaadiyon ke zareya Kerala rawana ki ja rahi hain. Sadar Majlis Ittehad ul Mslimeen wo Rukn e Parliament Hyderabad Barrister Asaduddin Owaisi ki nigrani mein yeh adwiyaat aaj shaam Darussalam se rawana ki ja rahi hain. Yaad rahay ke Majlis Ittehad ul Muslimeen ne ‘Majlis Charitable Trust’ ke zareya 16 lakh rupay ki maali imdaad karne ka bhi faisla kya hai jo Chief Minister Kerala ke Relief Fund mein jama karwai jayen gi. Trucks ke sath Doctors aur tibbi amlah ki bhi aik team rawana ki jarahi hai. is mauqa par Barrister Asaduddin Owaisi ke farzand master Sultan Salahuddin Owaisi aur Joint Editor Roznama Etemaad janab Aziz Ahmed ke alawa Owaisi Hospital and Reserch Center aur Princess Esra Hospital ke Doctors aur amlah maujood thae. Adwiyaat ke intikhab aur un ki khareedi mein Qayed Majlis Muqannanah Party wo Managing Dirctor Owaisi Group of Hospitals janab Akbaruddin Owaisi ke alawa mazkoorah dono Hospitals ke Doctors aur amlah ki muawinat rahi hai.