Hyderabad. Banjara Hills Police Station ke hudood mein waqay Brindavan Colony, Tolichowkhi mein muqami makeeno ki salamti ko behtar bananay ke maqsad se nasab kardah Closed Circuit Television (CC Tv) Cameras ki tanseeb ke do din baad hi teen naujawanon ney chori karli taham Cameras ney disconnect kiye jaany tak chori ke manazair ko nah sirf qaid kya balkay recorders mein un ko mehfooz bhi kardiya. Banjara Hills Police ney aisay 8 Camera chori karne walay teen naujawanon ko hirasat mein le liya hai. Muqami logon ney shikayat darj karwai ke 10th August ki shab 8 Cameras aur connecting wires ka sarqa karliya gaya hai. Brindavan Colony Wellfare Association ke ohdedaron ney apni shikayat mein bataya ke Park Area aur Masjid e Fatima ke atraaf lagaye gaye CC Tv Camera sarqa karliye gaye hain. Park aur Masjid ke ilaqa ki behtar nigrani aur ghair samaji sargarmion ki sarkubi ke liye yeh camera sirf do din qabal yani 8th August ko hi nasab kiye gaye thay. Sareqeen ney un Cameron ka sarqa to karliya magar unhen kya maloom tha ke jin Cameron ka woh sarqa kar rahay hain wohi Camare un ki harkaton ko apne record mein mehfooz bhi kar rahay hain. Banjara Hills Police ney bataya ke Masjid mein rakhay gaye Digital Video Recoder (DVR) aur monitoring systems ney chori ke manazair ko bhi mehfooz karliya. Tehqeeq ke dauran Police ney DVR mein mehfooz footages ka mushahidah kya aur is dauran muqami ilaqa ke hi teen qusoorwaar naujawanon ki nishandahi karli gayi. Inspector Banjarahills Mr K Srinivas ney bataya ke un footage ki madad se hum ney khation ki nishandahi karli aur unhen girftar karliya hai. Aisay hi noiyat ke waqiyat shehar ke deegar maqamat par bhi paish aaye hain. Teen naujawanon ney Police ko bataya ke woh CCTv Cameras ki tanseeb se nakhush thay, chunkay woh raat ke auqaat is ilaqa mein ghuma phira karte thay. Woh nahi chahtay thay ke un ki naqal o harkat par nigrani rakhi jaye. Karkhana Secunderabad ke aik taajir ke khilaaf muqadma darj karliya gaya jis ney apne mulazim ko community CCTv tod daine ki mobayyana hidayat dey raha hai. Woh nahi chahta tha ke deegar makeeno ko is ki naqal o harkat ka pata chalay. Taham yeh tod phod dosray CCTv Camera mein qaid hogayi.