Afghanistan mein Taliban Tehreek ke anasir ne Mulk ke shumal mein waqay fauji adda par hamla kar ke qabza karliya aur kam az kam 17 Afghan faujion ko halaak aur 15 ko zakhmi kar diya. Muqami zimmaydaraan ne mangal ke roz bataya ke guzishta do roz mein ladai ke douran darjanon Afghan faujion ko qaidi bhi bana liya gaya. Afghanistan ke soobay Faryab ki council ke sarbarah Mohammad Tahir Rahmani ka kehna hai ke Taliban ne itwaar ke roz se shuru honay walay hamlon mein Gormach ke ilaqa mein waqay fauji adda mein maujood tanks aur gola barood par qabza kar liya hai. Hum adda mein daakhil nahi ho sakay aur is ka bada hissah abhi tak Taliban ke zair e control hai. Ilaqai ohdaydaaron ke mutabiq Taliban ne 40 Afghan fojion ko qaidi bana liya jab ke ladai mein uss ke apne 30 musallah arkaan halaak hue. Afghanistan ke shumal mein Taliban ka yeh hamla aisay waqt mein huwa jab ke Mulk ke junoobi mashriq mein Ghazni soobah mein jharpon ka silsila jari hai. Guzishta hafta shuru honay wali jhadpon mein ab tak sainkdo afraad halaak aur zakhmi ho chuke hain. Is douran Afghan fauj ko Amrici jungi tayyaron ki muawinat haasil hai. Ghazni se faraar honay walay Afghan shehrion ka kehna hai ke ladai ke nateeja mein shehar mein bijli aur pani ki farahmi ka silsila munqita ho gaya hai aur har taraf tabahi aur barbadi pheli hui hai. Taliban ke tarjuman Zabeehullah Mujahid ne id-daa kya ke 57 faujion ne Taliban ke agay hathyaar daal dyie aur deegar 17 ko fauji qaidi bana liya gaya hai aur 8 Humvee gaadiyan zabt karli gayi hain.