Aaj se taqreeban 45 baras qabal 31st decemeber 1973 ko “Zumara” nami aik bahri jahaaz Dubai ke saahil par langar andaaz huwa to is mein aik 17 sala Bharati naujawan Yousuf Ali bhi sawaar tha jo deegar mutadid ghareeb afraad ke sath “rozi roti” ki talaash mein yahan pahoncha tha, os waqt koi nahi jaanta tha ke yeh naujawan anay walay waqt mein Dubai ka aik ahem tareen aur mashhoor tareen taajir ban jaye ga. Yeh wohi hain jinhein aaj duniya ‘Lulu Group’ ke sadarnashin ki haisiyat se jantee hai. Yousuf Ali ki umar is waqt 62 baras hai aur woh “Lulu Hyper Market” ke naam se stores ki aik chain ke maalik hain. Is ka shumaar Mutahidda Arab Emirate UAE ke mashhoor aur qadeem tareen stores mein hota hai. Rawan baras 18th July ko mazkoorah store ne apni 150th shaakh ka iftitah Saudi Arab ke dar-ul-hukoomat Riyadh mein kya. Lulu Stores ka silsila is waqt 21 mumalik tak phail chuka hai jahan 37 mukhtalif Nationality se talluq rakhnay walay 40 hazaar se ziyada mulazmeen kaam kar rahay hain. Yousuf kehte hain ke kisi bhi ghair mulki naujawan ki terha woh bhi behtar mauqa ke khawab dekhte thay. Unhon ne bataya ke woh kisi nai cheez ki talaash mein UAE aeye thaiy. Yousuf ke mutabiq jis zamana mein woh UAE aeye thaiy us waqt aalami satah ki yeh taraqqi aur shaandaar khidmaat maujood nahi theen jo aaj UAE mein dekhi ja rahi hain. Yousuf ne bataya ke un ke ghar, daftar aur kaam ki kisi jagah bhi air-conditions ki sahoolat muyassar nahi thi jo mausam ki garmi ko kam kar sakay. Alawaazeen sadkain kam theen aur aamad o raft aur naqal wo hamal dushwaar tha. Yousuf ne bataya ke “garam tareen mausam mein hum pooray din zameen par musalsil pani giratay rehtay thay taa ke fiza mein kuch thandak paida ho”. Is purmasahqqat zindagi ke sath aaghaz kar ke Yousuf Ali is waqt “Lulu Hyper Market” ke maalik hain. is Store ki duniya ke mukhtalif hisson mein tijarti sar garmion ke zareya honay wali salana aamdani 7. 42 arab dollar ke qareeb hai. Yousuf Ali ka kehna hai ke un ke andar aik cheez thi jo musalsil yeh bawar karati thi ke UAE aik roz taraqqiyafta aur shaan daar riyasat ban jaye gi. Yousuf ke mutabiq UAE ne tail ki bar aamad se apni taraqqi ka safar shuru kya aur phir mukhtalif noiyat ki tijarti sar garmion ka aik ahem tareen aalami markaz ban gaya. Yousuf kehte hain ke “ibtidayi barson ke sakht dinon neh mujhe sanjeedgi ke sath kaam karne, khud ko waqf kar dainay aur maal ki qader sikhayi”. Inhen Middle East ka Retail King bhi kaha jata hai. Forbes magazine ke mutabiq ameer tareen logon mein Yousuf Ali aalmi satah par 338th muqaam par hain jabkay mutamavvil Hindustanion mein un ka number 27 wan hai. Woh 4.1 billion dollars qader ke asasa jaat ke maalik hain.