Jurm saabit honey par 15 saal qaid ki saza hosakti hai. Jabir baap ney baityon ko ghar mein band kar rakha tha. Gharelo tashadud se tang aakar biwi chode kar chali gayi thi.
Rusia mein Police teen naujawan ladkiyon par jo aapas mein saggy behnain batayi jati hain apne Mafia Boss waalid par jinsi, jazbaati aur jismaani ziyadtion ke baad usay chaqu se waar karkay halaak karne ka iqraar karne par Kristina (19), Angelina (18) aur Maria (17) ke khilaaf qatal ke ilzamaat aayed kiye hain. Maqtool ki shanakht Mikhail Khachaturyan ki hesiyat se ki gayi hai. Rusian zaraye ablaagh ke mutabiq ‘sang dil’ baap ki teeno baityon ney apne waalid ki sakhtiyon aur beja tasahddud se tang aakar bil akhir usay mout ke ghaat utaar diya. Maqtool ke jism par chaaqo ke waar ke kayi nishaanat thay aur us ki laash flats ke Mosco block ke lift ke paas pafi mili. Teeno baityon ney iqraar kya ke unhon ney mil kar apne waalid ko mout ke ghaat utaar diya hai aur Police ke samney id-daa kya ke woh heroin ka nasha karne ka aadi tha aur kayi martaba un ki asmat raizi karne aur jaan se maardeney ki dhamkian di theen. teeno baityon ka kehna hai ke un ke waalid ney un ki zindagi ajeeran bana rakhi thi. Woh rozana un ki marpeet karta, ghar mein band rakhta aur terha terha ke tashadud ke harbe istemaal karta, nashay ka aadi tha. Tang aakar bil-aakhir unhon ney sang-dil waalid se gulu khulasi ke liye usay chaaqo aur kulhadhe ke waar karkay mout ki neend sulaa diya. Roos mein qanoon nafiz karne waley idaron ke zaraye ka kehna hai ke apne waalid ki qaatil teen ladkiyon ko hirasat mein liya gaya hai.
Sakht-geer baap
Mikhail Khachaturyan ke baray mein mukhtalif aaraa samney aayi hain. Aik taraf woh sakht mazhabi shakhs tha aur baityon ko ghar ke andar bhi mazhabi libaas istemaal karne par sakhti se Kaarband karne ki koshish karta magar doosri taraf woh manshiat mafia ka bhi sarghana tha. Khud bhi manshiat istemaal karta. Police ka kehna hai ke jab unhon ne maqtool ki gaadi ki talashi li to is mein inhen aatsheen asleha aur do kilogram heroin bhi mili. Hirasat mein li gayi teeno ladkiyon ney apne waalid ko qatal karne ka aitraaf kya hai. Un ka kehna hai ke baap ney un ki zindagi azaab bana rakhi thi jis ke baayis unhon ney usay hamesha ke liye khatam karne faisla kya. Kristina ney kaha ke hum is se nafrat karti theen, hum chahti theen ke aisa kuch hojaye ke ya to woh gayab hojaye ya hum is ko kabhi na jaanen. Teeno ney id-daa kya ke waardaat ke din bhi un ke baap ney un par chaaqo se hamla karne ki koshish ki magar is martaba un teeno ney us par qaboo paate hue par pay darpay waar karna shuru kar diye. Ahal e mohalla aur Khachaturyan ke jan-ney walay bhi usay aik sakht-geer aur sang-dil shakhs ke taur par jantay hain. 57 sala Khachaturyan ney teeno baityon ko school bhejney ke bajaye inhen ghar mein band kar rakha tha aur un ki naqal wo harkat par nazar rakhney ke liye khufia cameras laga rakhtay thay. Us ney aik beti par jinsi tashadud bhi kya magar woh unhen jismani aur zehni taur par har waqt tashadud ka nishana banata rehta. Padosion ka kehna hai ke Mikhail aik baar apne pooray khandan ko jungle mein le gaya aur unhen qatal karne ki dhamkian den. Us mauqa par is ki biwi faraar hogayi. Us ney bachon ko sakhti ke sath mana kardiya ke woh apni walida se rabita na karen. Aik muqami TV Channel 112 ke mutabiq Khachaturyan ney aik beti par jinsi tashadud kya jis par is ney khud kashi ke liye badi miqdaar mein golian kha li theen taham doctors ney usay maut se bchalya. Aik baar Khachaturyan ka beta apne aik dost ko le kar ghr aaya to Khachaturyan ney shor machana shuru kardiya ke us ajnabi ke sath us ki baityon ke najaayez taluqaat hain. Rusia mein sarkari satah par is waqea ki tafseelaat samney nahi ayen taham zaraye ablaagh ke mutabiq girftar ki gayi teeno ladkiyon ko apne waalid ke qatal ke jurm mein muqadma ka saamna hai aur unhen 15 saal tak qaid ki saza hosakti hai.