‘ Khawateen ki aala taleem ka tasawwur aur amal’ par Shob-e-Islamic Studies MANUU mein ek roza Webinar ka ineqaad
Hyderabad: Insaan ki yeh ek badi khasusiyat hai ke is ke andar kisi namumkin cheez ko mumkin mein tabdeel karne ki sift hoti hai, Taleem ke zareya is ki isi sift ko parwan chadhaya jata hai. Taleem ka bunyadi maqsad yeh hai ke woh insaan ke andar samaaj ke tain ehsas zimma daari peda kere“. Un khayalat ka izhaar Professor Siddiqui Mohammad Mahmood, Registrar Incharge, Maulana Azad National Urdu University ne shoba Islamic Studies, MANUU ke ek roza Webinar mein kiya. Yeh Webinar shoba “Islami mutalaat forum” ke zareya “Khawateen ki aala taleem ka tassawur aur amal Mashriqi aur maghribi tanazer ke unwan par 12 October ko MANUU mein munaqqid kiya gaya tha. Unhoun ne apne iftitahi kalmaat mein mashriqi aur maghribi mufakreen ke nazriaat ke hawalay se baat ki aur bataya ke un dono nazriaat ka haasil yeh hai ke taleem darasal woh hai jis ke zareya fard aur samaaj ka ertaqa hun. Webinar ke pehlay maheman muqarrar Dr Waris Mazhari, Assistant Professor Shoba Islamic Studies, Jamia Hamdard, Delhi ne ”Khawateen ki aala taleem ka mashriqi tanazer“ par guftagu karte hue kaha ke ”Quraan-o-Hadees mein husool ilm ke silsila mein jo talemaat di gayi hain un mein mard-o-aurat ke darmiyan kisi qisam ki tafreeq nahi ki gayi hai. Ahad Nabawi, Ahad Sahaba, Ahad Tabayan aur baad ke adwaar mein bhi is ke taamul ke silsila mein koi tafreeq nazar nahi aati, Chunancha khawateen se mutaliq Hadees ka ek chothai hissa tanha hazrat Ayesha Sadiqa se manqool hai. Aur Sahasata mein taqreeban 4 hazaar Hadees khawateen se manqool hain. Unhoun ne bataya ke Ibn Hajar Asqalani, Jalaluddin Siwati, Ibn Asakr waghera jaisay buzurgaan deen ke asatezaa mein khawateen ki badi tadaad shaamil hai“.
Professor Ishtiaq Danish, Sabiq sadar Shoba Islamic Studies, Jamia Hamdard ne ”Khawateen ki aala taleem ka maghribi tanazer“ ke mauzo par malomati guftagu pesh ki. Unhoun maghrib ke Ilmi Irtaqa ke tareekhi tanazur pesh karte hue kaha ke ”maghrib mein salebi jangoo mein shikast ke baad hi khawateen ke liye husool ilm ke darwazay batadreej khilnay shuru hue. 1870 ke baad khawateen ne taleem ki janib baqaida koshishen shuru kee. Phir janf azeem awwal ke baad maghrib mein School ke darwazay mard-o-aurat ke liye yaksaa tor par khol diye gaye aur is ke miyaar ko bhi buland kiya gaya. Balkay agay badh kar unhoun ne 12 saal ki omar tak mard-o-zan ke liye taleem ko laazmi qarar dya“. Mohtarma Zeeshan Sarah, Assistant Professor Shoba Islamic Studies, MANUU ne ”Muslim khawateen ki aala taleem: Amli masail aur hal“ Par guftagu karte hue kaha ke ” Secondary taleem ke baad Muslim khawateen umooman aala taleem se mehroom reh jati hain. Ladkiyon ke liye Graduation ki taleem ko ideal mana jata hai. Gurbat aur kuch aala taleemi idaron ka na munasib mahol bhi khawateen ki aala taleem se mehroomi ka ek sabab hai. Unhoun ne kaha ke Muslim samaaj ki zehniat ko khawateen ki aala taleem ke hawalay se badalny ki zaroorat hai. Shadi taleem ki raah mein rukawat nahi hai. Khawateen ki taleem ke liye misbet badlao? ke liye Seerat-e-Nabi ﷺ ka mutalea karne aur is par amal karne ki zaroorat hai“.
Webinar ke shuru mein Professor Mohammad Fahim Akhtar ndoy, Sadar shoba Islamic Studies, MANUU ne mehmanon ka istaqbaal karte hue mojooda waqt mein is mauzo par Webinar ko intehai ahem bataya, Unhoun ne akheer mein apne ikhtitami kalmaat mein teenu muqarareen ke ahem aur par maghaz khitaab par shukriya ada kiya. Unhoun ne kaha ke ”Aaj ke Webinar ka yahi pegham hai ke Islam ne mard-o-aurat ke darmiyan husool ilm ke silsila mein koi tafreeq nahi rakhi hai, Islam ki ibtidayi sadiiyon mein khawateen taleem ke aala miyaar par theen, Lehaza aaj bhi ilm haasil karne ka silsila jari rakhna chahiye aur miyaar-o-kamaat haasil karna chahiye. Un ke husool ilm mein nah sirf ghar walay balkay Sasural, Khandan, Samaaj aur hukoomat ko bhi madad karni chahiye, Aur har haal mein ilm ki aala manzilon ko tay karna chahiye“. Saleh Ameen ( PhD ) ki tilawat kalaam se is Webinar ka aaghaz huwa. Mohtarma Zeeshan Sarah ne maheman muqarareen ka taaruf pesh kiya. Anam Muhammadi Sheikh ne mohtarma zeeshan sarah ke sath mushtarqa tor par nizamat ke faraiz anjaam diye. Kalmaat Tashakkur Mohtarma Zeeshan Sarah ne ada kiye, Muqarareen ke khitabat ke baad sawal-o-jawwab ka bhi waqfa raha.