New York: US Open ke dosray Semifinal mein sansani khaiz muqablay ke baad Serena Williams ko Victoria Azarenka ke khilaaf shikast bardasht karni padi halaank unhoun ney pehla set ba aasani apne naam karliya tha. Victoria ney pehlay set gunwanay ke bawajood Serena Williams ko 3 sets par mushtamil sansani khaiz Semifinal mein shikast di. Belarusian ki star khiladi Victoria ney Arthur Ashe Stadium ki band chhat ke neechay 1 ghanta 56 minute taweel muqablle mein 1-6, 6-3, 6-3 se Serena ko shikast di.
Victoria ab hafta ke final mein Japan ki Noami Osaka ka muqablay karen gi. Victoria ka yeh taqreeban 7 barson mein pehla Grand Slam Final hoga kyunkay 2013 mein Williams nay US Open ke final mein Victoria ko shikast di thi. Kamyabi ke baad izhaar khayaal karte hue Victoria nay kaha ke mein is mauqa ke liye be hadd mashkoor hon. Mein bohat shukar guzaar hon ke Semifinal mein is terhan ke champion ke khilaaf muqablay ka mauqa mila.
Do martaba ki Grand Slam faateh Victoria nay Grand Slam mein is se qabal kabhi bhi Serena Williams ko shikast nahi di thi aur is martaba bhi Semifinal mein aisa lag raha tha ke woh pehlay set mein 6-1 se shikast kha jaane ke baad ek aur shikast ki taraf jarahi hai.
Lekin 31 sala Victoria nay apni service ko behtar banatay hue hareef ke khilaaf nah sirf ziyada jarehana khail pesh karna shuru kiya balkay apni az khud ghaltion par bhi qaboo paana shuru kiya. Belarusian se talluq rakhnay wali Victoria ko 2012 ke US Open mein bhi Williams ke khilaaf is waqt bhi shikast bardasht karni padi thi jab unhoun teesray set mein 5-5 se match barabar karne ke bawajood 7-5 se shikast khayi.
Victoria December 2016 mein Maa bani aur phir haliya barson mein un ke betay ko apni hirasat mein lainay ki qanooni ladai ny un ke Career ko mutasir kiya lekin unhoun ny US Open mein shandaar wapsi ki hai aur Serena ke khilaaf tawaqqa ke khilaaf kamyabi haasil ki hai.
Doosri janib is shikast ney Williams ki Margaret Court ke 24 Grand Slam singles khetabat ke Record ko barabar karne ki umeed ko umeed hi bana diya hai. Serena ko ab aglay Grand Slam ka intezaar karna pade ga. Qabal azeen pehlay Semifinal mein Japan ki Naomi Osaka ney muqami khiladi Americi Tennis Star Jennifer Brady ko sakht tareen aur 3 Sets par mushtamil muqablay mein 7-6, 3-6, 6-3 se shikast di.