Ajmer: Pakistan mein intekhabat 2018 mein hissa lainay walay mukhtalif jamaaton ke umeed waar apni kamyabi ke liye dua karne Ajmer Khwaja Gareeb Nawaz ki Dargaah pahonch gaye. sabiq wazeer e azam Pakistan aur haliya intikhabaat mein Pakistan peoples party ke umeed waar Raja Parvez Ashraf samait muslim league (noon) aur deegar siyasi jamaaton ke umeed waar Ajmer shareef mein waqay Maroof sufi buzurag hazrat khwaja ghareeb nawaz ki dargaah puhanche, chadar charhai aur intikhabaat mein kamyabi ke liye dua ki. dargaah khwaja ghareeb Nawaz ke khadim syed bilal Chishti ka kehna tha ke sabiq wazeer e azam Raja Parvez Ashraf , Muslim League (noon) ke umeed waar syed Imran Shah walii aur deegar jamaaton ke umeed waar dargaah par haazri day chuke hain jab ke rozana ki bunyaad par darjanon umeedwaron ki mobile calls bhi masool horahee hain jin mein intikhab mein kamyabi ke liye dua karne aur chadaway chadhanay ki istada ki jati hai. Pakistan mein siyasat daano ka apni intikhabi muhim ka aaghaz sufi buzurgon ki drgahon par haazri ke sath karne ka rivaaj aam hai jab ke wazeer e azam aur saddar ke kaleedi aur ahem ohdon ke liye umeedwaron ko kisi sufi buzurag ka mutaqid hotay bhi dekha gaya hai. haal hi mein Pakistan mein tehreek insaaf ke sarbarah Imran Khan ne bhi apni ahliya bashri bi bi ke hamrah Punjab mein waqay sufi buzurag ki dargaah par haazri di thi jab ke maazi mein be nazeer bhto, Asif Ali Zardari aur Nawaz shareef ko bhi sufi buzurgon se dua karate dekha gaya hai.