Hyderabad: Telangana ki Rachagunda police ney apne hudood mein aakhri safar Ambulance khidmaat ka aaghaz kiya. Commissioner police Mahesh Murlidhar Bhagwat ne Naredmet mein waqay police commissionaire mein is khidmaat ka jhandi dekhakar aaghaz kiya. Is mauqa par khitaab karte hue unhoun ney tanzeem ke zimma daaron ki masaayi ki sataish ki. Is tanzeem ney pehli martaba Hyderabad commissionaire hudood mein un khidmaat ka aaghaz kiya. Baad azan Cyberabad aur phir ab Rachagunda mein is ka aaghaz kiya gaya.
Unhoun ne kaha kay ye muft khidmaat hain jis ke zareya kisi bhi zaat ya nasal se talluq rakhnay walay Covid ya ghair Covid se marnay walay afraad ki laashon ko muntaqil kiya jaye ga. Is ke liye marnay walay ke rishta daaron ko phone number 7995404040 par call karna hoga. Ye khidmaat subah 8 bajey se shaam 6 bajey tak dastyab hai. Kisi bhi marnay walay shakhs ke rishta daar agar is ki aakhri rasomaat karne ke ahal nahi hain to ye tanzeem is ki bhi zimma daari uthae gi. Ye tanzeem 10 IT peshawaron par mushtamil hai jo kayi barson se samaaj ki khidmat karte aeye hain. Lockdown ke douran is tanzeem ney kayi afraad ko un ke aabadi maqamat par pohanchaya aur sath hi kayi afraad ke liye ghiza ka bhi intizam kiya.