Maktoob mein kaha gaya ”Hum Hindustan ke Wazeer e Azam Modi ka naam tajweez karne ke mushtaq hain, jinhon ne 4 barson mein 52 Mumalik ke 41 asfaar karne ka aalami record qaim kiya hai.
Panaji. Congress party ki Goa Unit ne kal Guinness World Records se mutalba kya ke Wazeer e Azam Narendra Modi ke naam barri tadaad mein beron Mulk ke asfaar karne ka record darj kya jaye. maktoob mein kaha gaya ” hum Wazeer e Azam Narendra Modi ka naam tajweez karte hue khushi o musarrat mehsoos karte hain jinhon ne apni chaar sala meyaad ke douran 52 Mumalik ke 41 asfaar karte hue aalami record qaim kya hai.” Goa Congress ke tarjuman Sankalp Amonkar ki janib se likhe gaye maktoob ki naqal media ke hawala ki gayi. maktoob mein id-daa kya gaya ke Wazeer e Azam Modi ne –apne bairooni asfaar par 355, 30, 38, 465 rupay kharch kiye hain. maktoob mein kaha gaya ”Wazeer e Azam, Hindustan ki nai nasal ke liye Role Model ban chuke hain chunkay, duniya bhar ke Mumalik mein kisi bhi Mulk ke Wazeer e Azam ne bairooni Mumalik ka (is qader ziyada) daura nahi kya hai.” Maktoob mein bataya gaya ”hum aap ko aagah karna chahtay hain ke un ke daur mein Hindustani rupiya ki qader US dollar ke muqaabla ghat kar 69. 03 tak pahonch kar Hindustani Currency ko nihayat hi kamzoor aur Asia mein badtareen muzahira karne wali Currency banadiya hai. Akhbaari numaindon se baat cheet karte hue Amonkar ne id-daa kya ke Wazeer e Azam ne Hindustan se ziyada waqt bairoon Mulk guzara hai.