Sharjah: Sharjah Executive Council ke rukan aur Sharjah human Resource Directorate ( SHRD) ke Chairman Dr Tarek Sultan Bin Khadim ney kaha hai ke guzashta roz se tamam sarkari mulazimeen ki apne mehakmoun aur idaroun mein kaam par wapsi ho gayi hai. Emarat ki sarkari News Agency WAM ke mutabiq Sharjah hukoomat ki Executive Council ki hidayat ke mutabiq aur nizamat ke jari kardah gashti nama ki bunyaad par aaj se mehakmoun aur dafatir mein mulazimeen ki wapsi ka amal shuru huwa hai.
Dr Tarek Sultan Bin Khadim ney kaha hai ke ye faisla Sharjah ke hukmaran Sheikh Dr Sultan Bin Mohammad Al Qasmi ke hukum ke mutabiq kiya gaya hai. Coronavirus ke philav ki rokk thaam ke baad tamam tar ahteyati tadabeer par amal karte hue aam zindagi mein batadreej wapsi ke jamia mansoobay ka hissa hai. Unhoun ney mukhtalif idaroun mein mojood mulazimeen ki zabardast kawishoun ko saraha jinhoun ney coronavirus ke bohraan par qaboo panay mein madad mein hissa liya.
Sharjah Human Resource Directorate ke Chairman ne mulazimeen ki hifazat ko yakeeni bananay ke liye mukhtalif qawaid o zawabit ki tameel karte huve sahet ki tamam zurori ahteyati tadabeer ikhtiyar karne aur mulazimeen ke mabain masharti faslati usooloun ki tameel ki ahmiyat par zor diya. Unhoun ne fariqain ke zareya tamam ahteyati tadabeer par sakhti se amal daraamad karne ke azm ki ahmiyat par zor diya jis ka maqsad is aalmi waba ko phelnay se rokna hai.
Is pishraft par tabsarah karte hue Sharjah ke mehakma E-Government ke Director General Sheikh Khalid Bin Ahmed Al Qasmi ne 100 feesad mulazimeen ko dafatir mein wapas karne ke Sharjah hukoomat ke ailamiye ko ahem qarar day diya. Unhoun ne kaha ke mojooda halaat ke ain mutabiq tamam mulazimeen ko kaam karne ke liye sehat mand mahol faraham karna zurori hai. Executive Council ke rukan aur mehakma Town Planning And Survey ( DTPS ) ke Chairman Engineer Khalid Al Mehri ne is baat ki tasdeeq ki hai ke mehakma ne Emarat ke mukhtalif ilaaqoun mein apne Head Quarters aur shaakhoun mein tamam ahteyati iqdamaat nafiz kiye hain.
Unhoun ney mazeed kaha ke coronavirus se bachao ke liye ahteyati tadabeer ke nifaz ki nigrani ke liye ek committee tashkeel di gayi hai jo sab mulazimeen ki hifazat ko yakeeni banaye gi. Khalid Al Mehri ney ye bhi wazeh kiya hai ke mehakma ney mulazimeen ke liye daur daraaz ilaaqoun mein mutadid Workshops ka nifaz kiya hai jis ka maqsad ahteyati tadabeer par amal daraamad ko yakeeni bananay ke tareeqoun ke baaray mein shaoor ujagar karna hai.
Emarat Islamia Sharjah ki Executive Council ke rukan aur Sharjah Directorate Of Public Works ( SDPW ) ke chairman Ali bin Shaheen Al Suwaidi ney Sharjah human Recourse Directorate ki hidayat ke mutabiq tamam mulazimeen ki barah e raast hifazat ko yakeeni bananay walay tamam hifazati iqdamaat uthany ke liye nizamat ki khwahish par zor diya hai.
Sharjah Health Authority ( SHA) ke chairman Dr Abdul Allah Bin Ali Mehyan ney is baat par zor diya ke Authority ney apne mulazimeen ki mulazmat ki jaghoun par bahifazat un ki wapsi ko yakeeni bananay ke liye tamam ahteyati aur hifazati iqdamaat mukammal kar liye hain.
Sharjah Roads and Transport Authority ( SRTA) ke chairman Engineer Yusuf Saleh Al Suwaiji ne kaam par wapsi par tabsarah karte hue kaha hai ke Authority ne dafatir mein wapas anay walay tamam mulazimeen ki hifazat ko yakeeni bananay ke liye tamam ahteyati iqdamaat mukammal kar liye hain aur Coronavirus ke phelao ko roknay ke liye Sharjah Human Resource Directorate ki zabardast koshisho ki tareef ki.
Mehakma khazana ke Director General Waleed Al Sayaak ne mulazimeen ka istaqbaal karne aur un ki hifazat ko yakeeni bananay ke liye mehakma ke Strategic mansoobay ki tareef ki.
Sharjah iqtisadi taraqqi ( SEDD ) mein support services department ke director Abdul Allah Al Mehmood neh is taraf ishara kiya hai ke mehakma neh ahteyati tadabeer par sakhti se amal pera honay ko yakeeni bananay ke liye tamam zurori ashya faraham kar di hain. Sharjah mein mehakma samaji khidmaat mein general services ke Director Mohammad Yousuf Ali neh wazahat ki hai ke wapsi ka faisla hakoomati kaam ke tasalsul ko badhaane aur mulazimeen ki batadreej wapsi ko behtareen qarar dete hue is ki ahmiyat bayan ki hai.