Riyadh: Saudi Arab ki insani Smuggling ke insidaad ke liye koshishen kamyaab ho rahi hain. Americi mehkamah kharja ki salana report mein Saudi Arab ki darjah bandi ko upgrade kiya hai. Saudi human rights commission ke sarbarah Dr. Awwad bin Saleh Al-Awwad ney kaha hai ke Saudi Arab ney insani Smuggling ke insidaad mein mazeed kamyabi haasil ki hai. Americi daftar-e-Kharja ney report jari karkay is baat ka aitraaf kiya hai ke Saudi Arab insani smuggling ke insidaad mein teesray darjay se ab dosray darjay mein agaya hai.
Website ke mutabiq Dr Al-Awwad neh jo insidaad insani Smuggling committee ke sarbarah bhi hain kaha ke insani Smuggling ke insidaad mein Saudi Arab ka muaqqaf behtar honey ka bada sabab ye hai ke mumlikat neh is hawalay se apne yahan islahat nafiz ki hain. Ye kaam Shah Salman aur Wali Ahad ki qayadat mein kiya gaya hai.
Dr Al-Awwad ney bayan mein kaha ke islahat ke zariye insani smuggling rokney ke liye behtareen qanooni dhancha tayyar kiya gaya aur is hawalay se idaara jati mahol saaz gaar baneya gaya. Unhoun ney mazeed kaha ke Saudi Arab insani smuggling ke insidaad ke liye musalsal koshan hai. Saudi Arab mein islami shariat nafiz hai aur Islam ney insani waqar ke manafi har amal ko ghinauna qarar diye huve hai. Islam insani haqooq ke tahaffuz aur waqar ke ehtram ki takeed karta hai.
Insani haqooq commission ke sarbarah ne bataya ke Saudi Arab insani smuggling ke insidaad ka qanoon jari kiye huve hai. Ye mo-asar qawaneen-o-zawabit par mushtamil hai jabkay mumlikat insani smuggling ke insidaad ke maahdon aur Protocols par bhi dastakhat kiye huve hai.
Dr. Awwad bin Saleh Al-Awwad ne kaha ke mumlikat mein insidaad insani smuggling ki committee mo-asar shakal mein apna kirdaar ada kar rahi hai jabkay wizarat afraadi qouvat o samaji behbood ne insidaad insani smuggling ka ek idaara qaim kar rakha hai. Insani smuggling ke juraim se tamam afraad ko tahaffuz faraham kardiya gaya hai jabkay mutasireen ki madad aur inhen muawza dilanay ka tareeqakar bhi mutayyan hochuka hai.